Willemstad – Tráfiko di pasahero pa Europa a oumentá ku 9% durante e di dos kuartal di 2014 kompará ku 2013, esaki dor di mas asiento for di Amsterdam i mas pasahero a bordo di avionnan di tantu Amsterdam komo Düsseldorf. Na mes momentu Kòrsou a eksperenshá un bahada di pasahero durante e di dos kuartal di 2014 di -5% kompará ku e di dos kuartal di 2013. E kantidat di pasahero ku ta sali a baha ku -2%, e kantidat di pasahero ‘transfer’ òf tránsito a baha ku -16% i e pasaheronan ku a yega a baha ku -4% kompará ku e di dos kuartal di 2013. Pasaheronan ‘transfer’ òf tránsito den mayoria kaso ta di e merkado Venezolano kual a sufri un bahada, dor di faktornan manera ménos asiento ku ta ser ofresé na e merkado aki i e situashon ekonómiko i klima polítiko difísil di e último lunanan. E segmento di pasahero aki ta keda un reto.

Canada ta keda fuerte i tráfiko Europeo ta krese
Tráfiko di pasahero for di i ku ta sali pa Europa a krese ku 9% durante e di dos kuartal di 2014 kompará ku 2013 dor di mas asiento for di Amsterdam i mas pasahero a bordo di buelonan di tantu Amsterdam komo Düsseldorf. E merkado di Nort Amérika a baha ku -7% durante e di dos kuartal di 2014 kompará ku 2013 dor di prinsipalmente ménos asiento ofresé for di Miami na e grupo di enfoke aki, si kompará esaki ku e kantidat ku a ser ofresé den 2013. Canada ta pèrmanesé fuerte i ta un merkado kresiendo i Air Canada a anunsiá e servisio for di Montreal i durante henter aña for di Toronto, kual lo kuminsá for di invierno di 2014. E merkado di Merka Latino a baha ku -7% durante e di dos kuartal  di 2014 kompará ku 2013 i esaki ta prinsipalmente dor di ménos tráfiko pa i for di Venezuela. Colombia, Panamá i Brasil a demonstrá kresementu i e ekspektativa ta ku esaki lo keda krese den 2014. E merkado Karibe (Reino Hulandes) a baha ku -10% durante e di dos kuartal di 2014 kompará ku 2013. Kompará ku aña pasa tin ménos kompania di aviashon ku ta ofresé nan servisio na e islanan i e tarifanan a subi, kousando esnan ku ta hasi biahe di plaser pa konsiderá otro opshon.

“Nos resultadonan di e dos kuartal di 2014 ta indiká fuertemente kon pasahero e industria di aviashon ta”, CEO di CAP Ralph Blanchard a splika. “E situashon aktual na Venezuela ta pone nos enfoká nos esfuerso pa sigurá ku nos lo mantené e servisionan aéreo aktual i, huntu ku nos partnernan di turismo promové promoshon i konsientisashon pa ku Kòrsou pa asina stimulá biahe pa Kòrsou i tambe pa traha ku nos partnernan den aviashon i marketing p’asina diversifiká nos ret di ruta den futuro serkano”.