Willemstad – CAP a konstatá un oumento signifikante di tráfiko aereo den e promé kuartal di 2015 i alabes ta nota ku sierto servisionan a surpasá e eskpektativanan. Segun CEO di CAP Ralph Blanchard 2015 ta mustra di lo bira un hopi bon aña pa tráfiko aereo pa Kòrsou. Curaçao Airport Partners (CAP) ta kontentu di por informá tokante e sifranan di tráfiko aereo registrá na Curaçao International Airport di e promé kuartal di 2015. E kantidat total di biahero den e promé kuartal di 2015 a oumentá ku 6% kompará ku e promé kuartal di 2014. E kantidat di biahero ku a yega Kòrsou a oumentá ku 8% i e kantidat di biahero ku a sali pa destinashonnan internashonal a oumentá ku un signifikante 13% den e promé kuartal di 2015 kompará ku e promé kuartal di 2014. Buelonan doméstiko, pues esnan pa e islanan di Karibe Hulandes, a baha ku -5% kompará ku 2014 i biaheronan ‘transfer’, kual ta biaheronan ku no tin Kòrsou komo nan destinashon final i ku ta kambia di avion, a baha ku -11% kompará ku 2014. Tantu pa Europa, e merkado mas grandi i mas fuerte pa Kòrsou, komo pa Merka, e merkado ku ta kresiendo mas fuerte, a konstatá un oumento di tráfiko di biahero di ambos 7% den e promé kuartal di 2015 kompará ku e promé kuartal di 2014. KLM a ekspandé su merkado ku adishon di buelonan dos bia pa siman ku e avion tipo A330, banda di e servisio diario ku e avion tipo B747. Ku e servisio adishonal KLM ta enfoká riba e merkado Aleman ku resultadonan positivo.  Arke a añadí kapasidat pa medio di e tipo avion B787 i a añadí buelonan durante e periodo di invierno. Na Norte Amérika, Air Canada a lansa su servisio semanal for di Montreal durante e periodo di invierno, kual a resulta sumamente eksitoso. Banda di e buelonan aki, e servisio di jetBlue ku buelonan dos bia pa siman non-stop for di JFK-New York pa Kòrsou a surpasá e espektativanan. E merkado tránsito for di Miami a sigui baha dor di e situashon ekonómiko i polítiko na Venezuela. Generalmente e merkado di Merka Latino a demonstrá un oumento sólido di 11% durante e promé kuartal di 2015, kompará ku e promé kuartal di 2014. No opstante e hecho ku e merkado di biaheronan ‘transfer’ a sigui baha, e kantidat di biaheronan for di Venezuela ku ta keda na Kòrsou (stay-over) a subi ku 10% kompará ku e promé kuartal di 2014. Di Colombia a registrá un oumento di 16% di biaheronan ku ta keda Kòrsou durante e promé kuartal di 2015, kompará ku e promé kuartal di 2014. Tantu InselAir komo Avianca a trese mas biahero for di Bogota i Medellin i InselAir a añadí su servisio for di Baranquilla. “Durante e ùltimo parti di 2014 nos por a konstatá un oumentu for di Europa i Norte Amérika i nos ta hopi kontentu ku e trènt a kontinuá i a surpasá e pronóstiko di CAP”, CEO Ralph Blanchard ta splika. “E kombinashon di e esfuersonan di nos partnernan pa krea konsientisashon i pa promové e tremendo i ùniko destinashon Karibense aki, kombiná ku nos relashon fuerte ku kompanianan aeroliña ku ta nos partner, ta ser reflektá den e resultadonan positivo. Servisionan adishonal aereo, merkadonan nobo i mas biahero ku ta keda Kòrsou for di nos merkadonan prinsipal, inklùso Venezuela, a forma e base pa loke, segun e trènt aktual, ta mustra di lo bira un hopi bon aña pa tráfiko aereo pa Kòrsou”.