WILLEMSTAD — Organisashon di Curaçao Clean Up a inisiá e di kuater edishon di e kampaña di limpiesa di nos isla dor di bati un bèl bou di awa pa zona e alarma pa ku situashon di limpiesa di nos isla. Dia 24 di Sèptèmber miles di boluntario lo lora manga pa limpia nos isla, inkluyendo nos playanan i bou di laman.

Por mira e lista di lokalidatnan riba www.curacaocleanup.com i tur interesado por indiká unda nan lo kier bai limpia. Rònt Kòrsou tin lokalidatnan ku mester ser limpiá, pues kada ken por buska un kaminda serka di kas. E organisashon ta spera ku e aña aki tambe diferente grupo di amigu, kompania, skol i famia lo partisipá.

E aña aki e enfasis ta riba e tema ‘un medio ambiente limpi, ta nos tur su responsabilidat. “Hopi hende ta pensa ku kombatí shushedat ta un tarea pa Selikor òf di polis. Pero na promé lugá ta nos mes mester hasi di nos parti pa tira shushi den baki òf hibé na landfill. I si un saku di plèstik òf kup bula bai ta tiki esfuerso pa djis bira kue for di abou, segun presidente di Curaçao Clean Up Maarten Schakel.

Fundashon Curaçao Clean Up ta kontentu ku e bon notisia ku awor si por parti but pa shushamentu di nos medio ambiente. “Nos ta spera ku esei ta enkurashá un i tur pa duna un man pa ku e limpiesa anual. Tambe nos ta hasi un yamada na tur instansia responsabel pa kontrolá aktivamente i atende ku e shushounan. Dor di parti mas but, esei mes lo yuda kubri e gastunan di kontròl, segun Schakel. E organisashon di medio ambiente ta spera ku maneho di medio ambiente lo haña mas prioridat serka politikonan. Ta lamentabel ku tiki partido politiko ku ta partisipá na elekshon di 30 septèmber tin programa konkreto pa ku medio ambiente.

Ku e lansamentu di Curaçao Clean up 2016 bou di awa, tambe e organisashon kier hala atenshon pa ku mantenshon di nos laman. Ora a sambuyá pa saka potrèt na Tugboat banda di Baya Beach, e organisashon a haña diferente bleki di serbes, kùp, bòter, saku di plèstik i asta kama di laman bou di awa. Tur e produktonan aki ta kibra bira pida chikitu ku bestianan ta kome i komo konsekuensia e piska lokal ku nos ta kome e ora ei tambe por tin e material chikitunan aki den nan kurpa. Por inskribí pa Curaçao Clean Up te dia 16 di Sèptèmber riba e website. Personanan òf kompanianan ku kier spònsòr ku sèn por akudí na www.curacaocleanup.com.