Willemstad. Despues di e promé edishon di 3 dia di CIFFR na 2012 e festival a krese den 5 aña di tempu i bira un evento grandi di 5 dia ku ta enserá muchu mas ku solamente pasa pelíkula den teater. E evento aki a bira aún mas grandi pa henter Kòrsou dor di diferente kompetensha, presentashonnan edukativo pa skolnan, presentashonnan den sentronan di bario i riba Brionplein, müzik i diferente tayer.
Koperashon den region
Pa logra un festival internashonal riba un isla ta lógiko ku mester traha huntu ku festivalnan den region. E promé lustro ta den lus di relashonnan di koperashon ku festivalnan ku kua CIFFR ta tin kontakto hopi estrecho durante e añanan ku a transkurí.
Representantenan di Festival Internacional del Nuevo Cine Latinoamericano de Cuba, Festival de Cine Global Dominicano, FEMI Guadeloupe, Martinique Film Festival, Festival Internacional de Cine de Morelia (Mexico) i Trinidad &Tobago Film Festival lo tei presente durante CIFFR 2016.
Masterclass Ernest Dickerson
Riba djaweps 7 di aprel pa 19:00 e produktor di pelíkula Ernest Dickerson lo duna e promé seshon di masterclass den e seri di 2 den kua no solamente su trabou komo sinematográfiko i direktor di esena lo bin dilanti, pero lo pone atenshon spesial riba e bista patras di pantaya na momentu di traha e pelíkula basá riba e famoso buki di Frank Martinus Arion: Double Play.
Kompetenshanan
E kompetensha anual di potrèt a haña e aña’ ki e título Capture Caribbean i tabata habrí pa fotógrafnan di tur pais i islanan di èks Antia i Sürnam. Nos a risibí mas ku 160 partisipashon for di tur e pais i islanan partisipante. E hurado lo selektá e ganadó di e “premio di hurado” den kada un di e sinku temanan : As Is Where Is, Angle, Frame-Set-Contrast, Blow Up (4 temanan di koló) i Night Watch (pretu ku blanku). E ganadónan pa e kompetensha aki lo keda publiká djabièrnè awor dia promé di aprel riba e wepsait www.curacaoiffr.com . Por wak tur e partisipashonnan di kada tema riba e wepsait aki.
E kompetensha di pelíkula kòrtiku Short Movies Big Stories pa promé biaha e aña’ ki tabata habrí pa produktornan di pelíkula no solamente di Kòrsou pero tambe di Aruba, Sint Maarten, BES i Surnam i tambe di tur e paisnan ku CIFFR tin relashon di kontakto ku nan. A hasi un selekshon di 3 pelíkula ku por mira riba pantaya durante e festival promé ku e pelíkulanan ku ta keda nominá pa Yellow Robin Award. E top 3 aki ta bin na remarke pa e premio Short Movies Big Stories Award (un biaha pa Hulanda pa presensiá un parti di IFFR 2017 i funshon di e pelíkula den e programa edukativo di IFFR) i e premio pa e promé finalista lo ta un suma di 500 dòler merikano.
Lo anunsiá e nominadonan riba djaweps 31 di mart promé ku presentashon di e pelíkula El Apóstata durante e Festival Preview.
E kompetensia pa Yellow Robin Award, ku a inisiá na 2013, tin komo meta pa duna produktornan nobo di pelíkula di Karibe i Latinoamérika un plataforma kaminda nan por desaroyá nan talento i duna nan un oportunidat pa subi merkado mundial. E pelíkula ganadó lo keda presentá otro aña durante un di e festivalnan mas grandi na Oropa: International Film Festival Rotterdam na Hulanda i en partikular den e parti di programa Bright Future .
E nominadonan pa e Yellow Robin Award 2016 ta:
Antes que cante el callo di Arí Maniel CRUZ (Puerto Rico) Ayiti mon amour di Guetty FELIN-COHEN (Haiti) Dar Noir di Hamadi MWAPACHU (Etiopia)
Good Friday di Harold DE VASTEN (Colombia) A orillas del mar di Bladimir ABUD (Repúblika Dominikana)
Diferente aktividat den kuadro di CIFFR 2016
Kwes di pelíkula
Riba djaluna 4 di aprel amantenan di pelíkula por partisipá den e kwes di pelíkula masha animá. Tim di 4 persona por inskribí riba e anochi ei mes for di 19:30. E kwes, bou di guia di DJ Maarten Schakel, lo start pa 20:00 riba Keukenplein, Punda.
Pelíkula den Bario
Despues di e try-out di nos último edishon, CIFFR lo presentá su festival den no ménos ku 4 bario. Den kada bario lo tin presentashon di un pelíkula ku ta adekuá pa henter famia. Entrada ta grátis i lo kuminsá pa 19:00 or en punto.
Djabièrnè Promé di aprel Sentro di Bario Montaña, djasabra 2 di aprel Sentro di Bario Otrobanda i Sentro di Bario Westpunt i djabièrnè 8 di aprel ta toka turno pa Sentro di Bario Souax.
Brionplein
Riba djamars anochi 5 di aprel, CIFFR ta invitá henter Kòrsou pa nos Teater na airu liber riba Brionplein. For di 19:30 lo kuminsá ku presentashon di pelíkulanan kòrtiku siguí despues pa e pelíkula prinsipal musikal: We Like It Like That ku ta trata orígen di Latin Boogaloo. Ta pidi pa tur hende ku ke bin e anochi aki pa nan trese nan stul chikí (di klap) pa sinta riba.
Presentashonnan edukativo
Riba djaweps 7 i djabièrnè 8 di aprel, CIFFR lo yama bonbiní na mas o ménos 3200 alumno di enseñansa di fundeshi i avansá pa e anual programa edukativo. CIFFR ta ofresé esaki na e hóbennan pa nan tambe sera konosí ku e festival i pa nan wak otro tipo di pelíkula.
Banda di esei e pelíkulanan ku ta ofresé ta kontené temanan ku ta serka di e mundu di e hobennan. Lo tin un guia huntu ku e pelíkula pa medio di un ‘lesbrief’ ku e dosentenan por uza pa prepará nan alumnonan pa e bishita na e festival aki. Temanan ku ta bin dilanti e aña’ ki ta: ‘tentamentu’ den De Boskampi’s pa enseñansa di fundeshi i ‘perseverá/realisá bo soño’ den The Idol pa enseñansa avansá. Mas informashon di e pelíkulanan aki por wak riba nos wepsait.
Konsierto Dennis Aalse Youth Orchestra (DOYA)
Banda di un konsierto den un forma mas chikí na The Cinemas riba e anochi di Apertura riba djarason dia 5 di aprel, Dennis Aalse Youth Orchestra lo presentá pelíkula konosí di músika riba djabierne 8 di aprel riba Renaissance Fountain Square. E konsierto aki ta liber i pa tur edat.
Mi ta hasi mi kos
E aña’ ki tambe lo tin presentashon di nos hendenan lokal. Banda di e pelíkulanan di potrèt di Jose Capricorne i Frank Martinus Arion, nos por presensiá durante CIFFR e dokumental biográfiko ku ta kontené hopi material di archivo i entrevista Mi ta hasi mi kos tokante di Rina Penso, un di nos gran artistanan di Kòrsou. Amigunan, koleganan i Rina Penso mes lo konta tokante di su talento, ‘drive’ i amor pa teater. “Mi ta sintimi na kas den teater”.
Despues di e estreno riba djabièrnè 8 di aprel pa 20:00 uur, lo presentá e pelíkula dos biaha mas durante e festival.
Curaçao International Film Festival Rotterdam ta di djarason 6 di aprel pa djadumingu 10 di aprel. Gjaweps 31 di mart lo repartí e programa kompletu di e festivalt. Ta kuminsá bende karchi pa tur funshon djasabra 2 di aprel pa 1o.00 na kaha di The Cinemas.