E aña aki Curaçao Lions Club a tene 500 mucha hopi kontentu ku un tremendo fiesta di Sanikolaas. E fiesta a tuma lugá djaweps dia 28 di novèmber den ouditorio di International School of Curaçao (ISC). For di 7:30 bùsnan a buska e muchanan y nan maestronan na skol y nan a wòrdu transportá na ISC. Na nan yegada nan wòrdu risibí dor di miembronan di Curaçao Lions Club y tambe Leo Club. E muchanan a disfrutá di un tremendo obra teatral presentá pa grupo Drasans. Despues Sinterklaas y su Piet nan a deleitá e mucha pa dos ora largu. Nan a duna un tremendo presentashon. E muchanan a baila, kanta y gosa un bòl. Durante di e mainta aki miembronan di Lions a malkriá e muchanan ku diferente pasaboka. Na final di e mainta e muchanan a regresá nan skol bek, kargá ku regalo y hopi pepernoot ku nan a risibí di Sinterklaas. Tantu e muchanan y maestronan a pasa un mainta ku hopi kontentu. Curaçao Lions Club un biaha mas a organisá un fiesta tur afó pa e muchanan.