Willemstad – Na luna di òktober e studiantenan di Marketing di Universidat di Kòrsou a hasi nan promé anunsio di e anochi inolvidabel ku nan tin den tapara pa selebrashon di Curacao Music Awards and Artist Exposure 2015 (CMA 2015), unda nan lo duna homenahe na artistanan musikal lokal ku a sa di destaká den mundu di farándula durante e último aña. CMA 2015 lo tuma lugá riba tereno di Universidat di Kòrsou i lo ranka sali ku un eksposishon artístiko.

Eksposishon di arte

Meta di e anochi no ta pa enfoká riba e artistanan musikal so, pero tambe eksponé sierto artefaktonan ku ta ser disenjá i trahá lokalmente. Lo tin entre otro studiantenan di arte di Art Heals Foundation ku lo presentá nan arte dor di entre otro pinta un kuadro durante e eksposishon ku ta ilustrá e ambiente di CMA 2015. Na final di anochi e kuadro aki lo ta na benta a base di findishi. Lo invertí e fondonan generá ku e kuadro den Art Heals Foundation. E artista Omar Sling, disenjadó di e palu di deseo den e hal di Sint Elisabeth Hospital, tambe lo t’ei presente ku artefaktonan úniko disenjá ku amor i pashon. Tatiana Saturino i su barínan apart di Tera Percussions no por keda afó. Kada partisipante di e eksposishon di arte lo trese nan propio dinamismo for di e mundu di arte dilanti.

Seremonia i animashon

Seguidamente lo tin e seremonia kual lo ta en kombinashon ku diferente presentashon di músika i baile. Durante e seremonia lo presentá e nominadonan i finalmente lo anunsiá e ganadó. Esaki lo sosodé segun kada kategoria. Eskoho di e nominadonan a sosodé bou di guia di profeshonalnan den sektor musikal kende lo ser menshoná riba Facebook, e Google Form  i durante e selebrashon di CMA 2015. Pueblo di Kòrsou por duna nan voto riba e Facebook page: ‘Curacao Music Awards and Artist Exposure 2015 – UOC’ i via Google form riba e nominado ku nan ta hanja mester sali ganadó apsoluto den su kategoria. Informashon di e Google form ta optenibel riba e página di Facebook.  Animashon di e anochi aki lo ta na enkargo di entre otro Mraizz, Dez, Raghmin Adriana, Reshine, grupo di baile Kizovics, Sonnos Band i e konosidó artista Hunnely.

Lugá: University of Curacao
Orario: 7or’ di anochi
Fecha: 7 di novèmber 2015
Entrada: Fl. 25,-

Karchinan ta optenibel na Universidat di Kòrsou (Repro) i tambe serka studiantenan di marketing di e terser anja. Personanan interesá por tuma kontakto na telefòn 661-7386 òf 685-5890 of email: curacaomusicawards@gmail.com