Jose Canseco ta un astro den mundu di beisbòl ku a mira tur dos banda di medaya di fama durante su karera komo atleta profeshonal. José Canseco Capas, Jr. a nase 2 di Yüli, 1964, na Habana, Cuba, i tin un pia di ohochi idéntiko yama Ozzie ku tambe a profilá den beisbòl profeshonal. Canseco a atmití di a usa supstansianan prohibí durante di su karera profeshonal i na aña 2005 e la skibi un buki sensashonal yama ‘Juiced’, unda e la identifiká diferente pelotero ku segun e tambe a usa supstansianan prohibí. Durante di su seminario di djabièrnè 31 di Mei, e lo elaborá riba e lèsnan ku e la siña i elaborá riba kiko SI e hóben mester hasi pa ta un mihó atleta.
Entre 6’or pa 8’or djanochi, lo tin un klínika ku Canseco na Tio Daou Ballpark, unda grupo di hóbennan beisbolero lo partisipá pa asina siña diferente téknika ku e astro deportivo aki lo kompartí ku nan. DJ Jörgel lo tei pa krea un tremendo ambiente, i pueblo di Kòrsou ta keda invitá pa bin animá e muchanan. Durante di e feria di tres dia ku ta tuma lugá na WTC, e intenshon ta pa trese diferente federashon deportivo i kompania di nutrishon huntu pa asina ilustrá e variedat deportivo ku nos isla tin i alabes eduká nos hóbennan i prospekto atleta riba kiko ta nutrishon apropiá ora ta práktika deporte.
Manera a anunsiá anteriormente, durante di e tres dianan di Curaçao Sport & Nutrition Fair, lo enfoká riba deportenan Beisbòl, Arte Marsial Miksto (MMA), Body-building i Fitness, unda vários astro deportivo internashonal manera Royce Gracie, Jemyma Betrian, Elvimar Sanchez, Roelly Winklaar i Jose Canseco, lo duna seminario riba nan respektivo deporte.
Henter dia lo tin diferente workshop i lektura duna pa vários federashon deportivo ku lo duna informashon di nan respektivo deporte, kual ku tur interesado por asistí. Adishonal lo un mesa rondó interesante ku vários atleta, coach i trainer lokal notabel kende lo kombersá riba desaroyonan di nan respektivo deporte i kontesta pregunta di públiko. E karchinan pa e seminarionan i klínikanan aki ta kosta 50,- florin pa adulto, penshonadonan riba 60 aña ta paga 35 florin, i hóbennan te ku 17 aña ta paga 25,- florin pa dia. Pa garantisá bo asiento na e seminarionan, bo por kumpra bo karchi adelantá na Mensing Caminada, Albert Heijn i van der Tweel Supermarket, i Beep Beep, òf na kantor di INM na Rooi Katootjeweg # 6.
Kòrda ku CSNF su entrada general pa dia pa e feria ta 10 florin pa hende grandi i 5 florin pa mucha te ku 12 aña.
Tur persona ku ke atkerí konosementu di deporte i nutrishon ta keda enkurashá pa bin Curaçao Sport & Nutrition Fair, entre 31 di mei pa 2 di Yüni, 2013 i tende e atletanan profeshonal aki kompartí nan eksperensia deportivo, unda bo konosementu lo amplia sigur. Porta di e feria i seminario ta habri 10’or di mainta i tur aktividat lo terminá 8’or di anochi.
Pa mas informashon check e wepsait di Curaçao Sport & Nutrition Fair ku ta www.curacaosportnutritionfair.com. Tambe por yama 737- 4606 òf e-mail na info@curacaosportnutritionfair.com.