Willemstad 27 di aprel 2015 – Curaçao Industrial & International Trade Development Company, Curinde N.V., resientemente a selebrá 35 aña di eksistensha. 35 aña di Curinde tabata un bon okashon pa para ketu na e kompania su fundeshi sólido, su maneho konsistente i kontribushon sostenibel di e Zonanan Ekonómiko (Koningsplein i Hato) i di Parke Industrial na ekonomia di Kòrsou. Durante di e selebrashon a hiba palabra Minister di Desaroyo Ekonómiko, Sr. Stanley Palm, Presidente Komisario di Curinde, Sra. Daisy Tyrol- Carolus i Gerente interino di Curinde, Sra. Jacqueline Jansen. E selebrashon ta inisio di un seri di aktividat den kuadro di e selebrashon ku e.o. ta tambe pa sera diferente stakeholder mas konosí ku nos Zonanan Ekonómiko i nos Parke industrial. Curinde desde su inisio na 1980 a bin ta manehá e Zona Ekonómiko (Zona Liber) na Koningsplein i Parke Industrial na Brievengat. Mas den tempu, na final di añanan 90, Curinde a desaroyá un di dos Zona Ekonómiko na Hato. Pa medio di e parkenan aki Curinde ta promové i fasilitá komèrsio internashonal i industria, ofresiendo edifisionan ku por sirbi un múltiple di propósito. E dos Zonanan Ekonómiko operá pa Curinde ta kontribuí ku no ménos 5% na nos produkto nashonal brutu i ta perkurá pa alrededor di 1000 kupo di trabou (tantu direkto komo indirekto). Ademas, aktividat den e parkenan aki ta kontribuí en grande na generashon di divisa pa nos pais. E akshonistanan den Curinde ta Gobièrnu di Kòrsou (85%) i Korpodeko (15%). E fundadó i promé direktor di Curinde tabata Sr. Carlos Römer Q.e.p.d., miéntras ku e di dos direktor tabata Sr. Eric Smeulders. Un palabra di gratitud na nan vishon i perseveransha. E tim aktual di Curinde ta keda dirigí pa Sra. Jacqueline Jansen. E klientenan establesé den nos Zonanan Ekonómiko i Parke Industrial Brievengat, semper a hunga un ròl importante den desaroyo di e zonanan i parke. Tin algun ku hasta tin mas aña establesé ku Curinde ta eksistí. Danki na e konfiansa di akshonistanan, e vishon i guia di gerensia i di e huntanan di komisario i tambe na empleadonan durante e añanan, ku awe por mira bèk ku satisfakshon. Por último bal suprayá e profeshonalismo ku semper e empleadonan di Curinde a hasi nan trabou na bienestar i desaroyo di e empresa. Selebrashon di 35 aniversario di Curinde ta marka tambe inisio di un era nobo den kua Curinde lo asumí un ròl mas aktivo komo katalisadó ekonómiko. Parti di e esfuerso aki ta konsentrá riba mehorashon di e fasilidatnan. Esfuersonan ta konsentrá pa hasi nos zonanan ekonómiko mas atraktivo i introdusí ideanan nobo i uso di espasio na un forma mas kreativo. Na ougùstùs lo finalisá i introdusí un “incubator” na Hato. Aktualmente tin un “food court” moderno den konstrukshon na Koningsplein, dos lots na Parke Industrial, miéntras ku ta kuminsá ku preparashonnan pa introdukshon di e konsepto di showroom na Koningsplein. Ademas, ta trahando pa intensivamente pa mehorá seguridat den tur tres parke. Kolaborashon ku otro entidatnan lokal ta masha importante pa Curinde por asumí e ròl empresarial aki; final di kuenta, ofresé mundu nos parkenan pa establesé ke men ofresé Kòrsou komo e sitio pa sea produsí òf hasi negoshi. Mes importante ta tambe seramentu di aliansa ku Zonanan Liber den nos region i otro organisashonnan internashonal ku lo por fasilitá nos búskeda pa desaroyá parkenan vibrante kaminda un diversidat na produktonan di kalidat haltu ta keda ofresé den nos region i na mundu.