Rotterdam-  den wikènt tras di lomba, grupo di baile D’Art Holland a kontribuí na engrandesé kultura di nos dushi isla Kòrsou den e obra teatral titulá Feijenoord Danst.  Un bunita obra ku ser ehekutá pa habitantenan, organisashon i kompanianan, skolnan i gruponan di baile den e bario di Feijenoord na Rotterdam. E obra aki tatin komo meta prinsipal: pa medio di baile i teater, pasa konosementu pa otro i alabes krea un base di estímulo pa otronan. Mustrando ku no ta importa bo rasa, religion, kultura ni koló. Importante ta pa bo hasi uzo di bo talentonan i ekspresá bo mes positivamente.  Un bunita mensahe ku a sa di hala atenshon di e públiko presente durante di tur e 4 funshon nan. D’Art Holland, un grupo di baile konsistiendo di hobennan yunan di Kòrsou residensiá na Hulanda i ku tin komo meta pa promové kultura di Kòrsou den eksterior, a sòru pa laga e públiko oropeo konosé nos kultura pa medio di koreografianan sumamente úniko. Ta un orguyo pa nos di tende ku Kòrsou su nòmber ta keda menshoná di un forma positivo den eksterior. Hopi bia yunan di Kòrsou bibá na Hulanda ta keda asosiá ku diferente pensamentunan negativo. Ta pesei nos tin ku balorá i apresiá kada un yu di tera ku di un òf otro manera, ta kontribuí na kambia e pensamentunan negativo aki. Kòrsou awe bo por ta orguyoso di tin yunan ku bo kultura na pechu i ku apesar di e diferensia di 9 ora di distansia, ta sigui promové bo kultura na un nivel artístikamente haltu. Nos lo keda vigilá kada un paso di grupo di baile D’Art Holland pa asina sigui informabo di kada un detaye relashoná ku nos kultura den eksterior.