WILLEMSTAD —  E siman aki un delegashon di e kompania nobo di aviashon den  proseso di lantamentu, AVA Curaçao BV, den persona di su Chairman Olivier Arrindell,  Giovanni Atalita ku ta e Presidente i Sra. Elizabeth Bravo Chestari ku ta e representante di AVA na Venezuela, riba invitashon di INAC, a realisá un bishita di serka konosí i establesé kontakto ku su presidente i staf. INAC  ta e Instituto Nashonal de Aeronautica Civil di Venezuela. Durante di e reunion ku as tuma lugá den  e edifisio prinsipal di INAC na Altamira, e delegashon di AVA Curaçao a keda risibí pa e propio presidente Lic. Pedro Alberto González Díaz i su staf, Chairman di AVA Curaçao, Sr. Olivier Arrindell a pasa riba e plan ku AVA Curaçao BV, pero tambe AVA Airways tini pa ku área di Karibe, Sentro Amérika i Sur Amérika, pero muy espesialmente e merkado di Kòrsou i Venezuela. E kompania di aviashon AVA Curaçao, manera ta konosí na e momentunan aki ta den e último fase pa risibí su lisensia ekonómiko pa asina ei pasa over pa e aspektonan tékniko ku lo mester pone kuminsá  realisá buelonan komersial, último dianan aki a bin ta duna diferente organisashon informashon di e plannan dje kompania i kon nan ta mira turismo di Kòrsou. Si siman pasa AVA Curaçao a reuní ku CHATA den persona di Sra. Liza Dindial i Direktor Interino di CTB, Sr. Hugo Clarinda, e siman aki a toka e representantenan di INAC pa interkambiá di idea ku AVA Curaçao. Nos por bisa, sin bai den detaye, ku e reunion tabata unu hopi positivo i di parti di INAC nan ta kla pa duna AVA Curaçao nan aporte total ku lo mehorá e konekshon aéreo di Venezuela i sigur Karibe, Sentro Amérika i Sur Amérika. AVA Curaçao ta yama danki na Consulado di Republica Bolivariana di Venezuela na Kòrsou, muy espesial Consul Lic. Sonia Alvarrado-Rossell pa su tremendo apoyo pa realisashon di e reunion aki.