WILLEMSTAD — E Programa di Akshon Desaroyo di Hubentut a organisá huntu ku Unidat di Bario un eksitoso seminario ‘tim sosial di bario’ dia 18 di mart den bario di Fleur de Marie, kaminda a traha for di 2010 na desaroyo integral di bario. E konsepto ‘tim sosial di bario’ a ser ehekutá aktivamente den e bario aki. E seshon a ser fasilitá dor di e Tigerteam Bibienda i Ambiente di Bida, kual ta boga pa partisipashon di hóben den formulá i realisá desaroyo di hubentut den di bario.

Mas o menos 600 hóben a duna di konosé durante e Diálogo Nashonal di Hubentut, kual a ser organisá den 2015 bou di ouspisio di Plataforma Nashonal pa Desaroyo di Hubentut, ku nan no tin un relashon fuerte ku nan ambiente di bida direkto i ku nan no ta sinti nan mes inkluí den e proseso pa desaroyá nan bario na bienestar di hubentut. Konkretamente nan a indiká ku nan lo kier mira timnan sosial den bario ku ta aksesibel, ku t’ei pa skucha i aktua rápidamente ora tin mester.

E Tigerteam Bibienda i Ambiente di Bida a tuma dentro di e Programa di Akshon pa Desaroyo di Hubentut e enkargo riba dje pa duna oído na hobennan i ehekutá un pilot ‘tim sosial di bario’. E intenshon ta pa inisiá esaki den yüni òf yüli, potensialmente den barionan di Koraalspecht-Kustbatterij-Nieuw Nederland-Marie Pampoen.

E seminario ‘tim sosial di bario’ tabatin komo meta pa entre otro siña di e ‘best practices’ lokal i internashonal. Unidat di Bario a kompartí ku tur presente nan eksperenshanan den Fleur de Marie. E sekretariado Desaroyo di Hubentut a kompilá resúmen ku ta inkluí e lèsnan di Fleur de Marie i tambe e eksperenshanan di Colombia i Hulanda. Un otro meta di e seminario tabata pa yega na un vishon komun di kiko ta enserá un tim sosial di bario. Ekspertonan i personanan ku eksperensha den bario a kompartí idea di kiko ta un tim sosial di bario i kon esaki lo mester funshoná. Tur presente tambe a indiká kiko lo tin mester pa realisá esaki i kiko nan mes lo por agregá i kontribuí.

For di e seminario a sali diferente rekomendashon komo kontesta riba e preguntanan, por ehèmpel ku mester tin un aserkamentu basá riba desaroyo di kompetensha i abilidat bou di hóbennan i ku mester tene kuenta ku hóbennan kier mira resultado lihé.

E siguiente stap den direkshon pa realisá e ‘pilot’ ta pa hasi un investigashon bou di hóbennan pa konkretamente inventarisá nan deseonan. Fin di mei lo tin un diálogo ku hóbennan riba e tema aki organisá pa e Programa di Akshon Desaroyo di Hubentut den koperashon ku diferente partners.