Despues di nan re-inicio tres luna pasa, Tiara Air no a bula mas. Tabata pues cuater siman despues cu Tiara Air a inicia nan operacion atrobe pa medio di un buelo pa Corsou, e compania mester a bula pa Corsou por lo menos un biaha pa dia, pero no a bula mas. Esaki pasobra e unico avion cu nan tabatin, lo a haya un problema ‘operacional’ cu lo a strob’e di bula. Mientras cu e compania mes nunca a haci mencion di esaki, Nos a wordu confirma cu su fuentenan cu a ‘ground’ e avion. Loke cu a compronde, ta cu e problema lo ta cu tin un fayo cu e ‘radar transponder’ cu no ta funciona. Y tanten esaki no funciona, nan no ta permiti pa bula cu e avion. 

A compronde cu tabata apenas 2 siman pasa cu por a hiba e radar transponder defecto aki Merca pa nan por traha riba dje. Tin informacion cu e compania no tin e tipo di aparato aki den stock como ‘spare’, unda cu ta indica cu esaki ta pa ‘reduci gasto’. Normalmente den casonan asina, e compania responsabel ta manda un pieza temporal pa e avion por sigui bula, mientras cu esun daña ta wordo drecha. Despues ora cu esun daña ta bek, ta manda esun ‘fia’ bek. Algo cu den e caso aki no a sosode.

A busca contacto cu e CEO, pero no a haya reaccion te cu awe riba e situacion. Mientrastanto for di momento cu e compania a hay’e den e problema aki, nan no a bin afo pa informa kico ta e motibo pa cual e no a ‘sigui’ bula, of ‘no por’ bula mas.

E hecho cu e avion no a sigui bula, no tabata positivo pa e compania mirando cu esaki por afecta nan situacion financiero. Durante un combersacion cu e CEO tres siman pasa, el a confirma cu un di e motibonan pa re-inicia nan buelonan, tabata pa por genera fondo pa por cumpli cu pago na e ex trahadonan cu ainda no a haya nan pago. A compronde cu diabierna ta e ultimatum pa paga e grupo aki, y ainda no a tende nada di Tiara riba esey. E hecho cu e avion no a bula, ta nifica cu nan no por a genera fondo tampoco, cu por dificulta e pago aki.