Den un enkuentro ameno den bario di Rif, Fundashon Rif a duna homenahe na 2 habitante di bario: 1 Na e persona di mas edad den bario Sra. Marianita Francisca Lucia, nanse 16 di yüni 1916 kariñosamente yama Shon Mayó. 2 Na e persona ku e tienda di bentana pa mas ku 50 aña Sra. Calista Maria Elsbeth – Pelgrim, nanse 14 di òktober 1928 kariñosamente yama Shon Ia di Rodolfo. Tambe a duna realse na nos héroe nashonal oriundo di bario di Rif. Carlos Manuel Piar. Pa e okashon aki a hiba palabra Sra. Sandra Lewis, Sra. Sandra a konta di su nines i hubentut den e bario di Rif i kiko Shon Mayó i Shon Ia di Rodolfo a nifika pa e i tambe algun anektoda. Despues a toka turno na Sra. Marusca Manuel ku a denominá e 2 damanan aki komo e damanan virtuoso. Den e di 2 parti Sr. Lionel Janga esun ku huntu ku Fundashon Rif a bin riba e idea pa traha un Mosaiko ku awe a ser desvelá na honor di Carlos Manuel Piar. Sr. Janga a enfatisá riba e importansha pa duna rekonosementu na nos héroenan pa nan logronan i tambe pa kende nan tabata. Sr L. Janga a duna un relato kòrtiko di loke Carlos Manuel Piar a nifika paKorsou i ku ta un persona ku a lucha pa nos libertat. Un mucha di Rif komo hóben a kore hunga den bario di Rif.