E di dos edishon di Churandy Martina Foundation Golf pa rekouda fondo a resulta un eksito
grandioso. Djasabra ultimo e presioso kancha di Blue Bay Golf & Beach Resort tabata e
escenario pa e evento. Partisipashon tabata kompleto, pa duna un aporte pa na e fundashon ku
ta hasiendo un gran trabou pa yuda deportistanan ku transporte, material i otro atributonan pa
nan deporte. Prome premio NET a bai pa Lilo Sulvaran i Vincent Zrour ku NET 60 golpi. Pa e
kategoria Gross (sin handicap) e ganadornan tabata Walter Hofstede i Rick Adriaans ku 62 tiru.
Tabatin tambe di dos i tercer lugar ku premio. E partisipantenan a forma equipo di dos persona
hungando e estilo di “two man scramble”. Kada un ta dal e bala i semper ta sigui ku esun miho
konekta.

Resientemente e fundashon Churandy Martina a entrega hopi material i otro nesesidatnan na e
federashon di atletismo local CAB. Tabatin diferente otro forma pa rekouda fondo. Golfistanan
por a gana un Volkswagen Tiguan na e di tres buraku, premio pa balanan konekta mas serka di
un liña i obhetonan. Tur esakinan tabata pa rekouda fondo loke sigur tabata un eksito.
Churandy Martina a bisa durante entrega di premio, ku otro biaha mester konsidera un grupo
mainta i un di dos atardi, komo ku e interés tabata grandi pa yuda e kousa di su fundashon.
Riba e foto un bista di e ganadornan.