WILLEMSTAD –  Djasabra dia 4 di novèmber Landhuis Brakkeput Mei Mei i Licores Maduro pa di seis aña tras di otro ta hinka nan skouru bou di e evento kulinario sin igual, Corks & Forks. No ta bai pa e kòrki, pero pa e dushi biñanan bou dje kòrki. Tampoko pa e fòrki, pero pa e platonan delisioso ku por purba kuné.

Corks & Forks ta e evento kulinario pa ekselensia pa amante i konosedó di un bon glas di biña i ku gusta laga nan malkri’é ku plato chikitu ekskisito. Durante un anochi na Corks & Forks un mundu kulinario nobo ta habri pa e wéspetnan; ku un glas di bon biña na man nan ta keiru di esun ‘área di biña’ pa e otro, miéntras ku nan ta saboriá platonan apropiá, manera variedat di keshi, escargot, pero tambe kreashonnan na moda di karne i piská na e mesanan kaminda por pruf.

E lanthùis di Brakkeput Mei Mei i tur e terasanan rondó ta repartí na diferente region di biña kaminda e siguiente kasnan di biña lo karisiá e papilanan di e wéspetnan: E. Guigal (Côtes du Rhone), Montes (vários region na Chile), Marchesi Antinori (Toscane), Chateau Saint Michelle (Washington State), Lindemans (sur este di Oustralia) i Martin Wassmer (Baden, Markgräferland). Riba e mesanan pa purba tin tambe diferente biña orgániko i tin un sekshon kaminda ta presentá e 5 biñanan tòp di Kòrsou. E aña aki atrobe lo tin biñanan spumante, Prosecco pero tambe Zjampaña den e hardin tropikal.

Aparte di e malkriansanan kulinario, e artistanan ta kompletá e anochi. E aña aki tambe tin un variedat na artista lokal i internashonal. Gino Coelho & Friends, e violista Venezolano Ernesto Molina i Igort Rivas riba su tròmpèt lo interkambiá riba e tarima prinsipal. Maarten Schakel i DJ Lu-C lo perkurá pa un ‘ambiente spumante’ den e hardin tropikal. Saksofonista Michael Anthony ta kanta i toka Jazzy Notes na e terasa meimei i Jaime Maria ta toka tròmpèt i ta kanta; nan t’ei pa e músika den fondo pa krea e ambiente adekuá. Gilmar Freitas huntu ku e nobatonan Luigi & Rebecca ta atendé e ambiente den e restorant. Ecole de Danse i Danzarte tambe lo t’ei ku show sorprendente.

Karchi na rason di 50 florin ta optenibel na Van den Tweel (Zeelandia i Jan Thiel), Licores Maduro i Mensing’s Caminada. Tambe por haña karchi na balor di 2250 Funmiles na e ofisina di Funmiles. E preis di entrada ta inkluí 25 florin na ficha. Ficha adishonal por optené durante e evento na e diferente puntonan di benta na Landhuis Brakkeput Mei Mei.