“Den kuadro di Dia Internashonal di Alzheimer, Skempi ta kolaborá ku Maduro & Curiel’s Bank pa hasi donashon di 100 Mp3 players ku músika lokal di antes i awor na pashèntnan di Alzheimer.” Investigashon sientífiko a prueba ku músika ta un instrumènt efektivo pa stimulá e funshon di memorianan. Pa e motibu aki Skempi i Maduro & Curiel’s Bank a kuminsá ku un proyekto pa pone piesanan lokal riba 100 Mp3 player pa por regalá pashèntnan di Alzheimer músika. Esaki ta forma parti di e selebrashon di e sentenario di Maduro & Curiel’s Bank. E tim di Skempi a wòrdu inspirá pa kuminsá ku e proyekto dor di un anochi di pelíkula ku a wordu organisá pa Mel’s Bliss na Hòfi Cas Cora. Einan a screen e pelíkula “Alive Inside” den kual ta trata e tema di e relashon entre músika i pashèntnan di Alzheimer. Komo plataforma di músika di Karibe, Skempi ya tin akseso na piesanan klásiko di Karibe Hulandes den generonan manera Tumba, Danza, Wals, Bolero. Pues huntu ku Maduro & Curiel’s Bank nan a duna e pashèntnan di Alzheimer e oportunidat pa krea un playlist personal ku kantikanan di e.o. Kimu Candelaria, Padú Del Caribe, Edgar Palm i Jose Casseres. Nan a hasi esaki huntu ku un eksperto musikal. Ku e proyekto aki nan ta spera di yuda pashèntnan di Alzheimer rebibá tempunan dushi di antes i tur e dushi sentimentunan mará na nan. Dia 21 di Sèptèmber último, Dia Internashonal di Alzheimer, Maduro & Curiel’s Bank i Skempi a regalá un kantidat di 100 Mp3 Player na Kas Hugenholtz, Fundashon Alzheimer,Music Therapy Center Curaçao, Fundashon Birgen di Rosario, Capriles Kliniek i CliniClowns.