Willemstad, – 5 di sèptembèr 2016 a keda proklamá komo e promé Dia Internashonal pa Dwarslaesie. Tur aña riba e mes un fecha mundialmente lo para ketu na alsa konosementu di komunidat tokante dwarslaesie i hasi un diferensia den e kantidat di personanan ku ta haña dwarslaesie. Komo resultado di esaki i pa krea mas konsiensia, Fundashon Alton Paas ta lansa e programa di televishon SUPERANDO ku 12 episodio di 30 minüt na kanalnan di Telecuracao i CBA.
International Spinal Cord Society (ISCoS) ta un sosiedat di profeshonalnan i tin un miembresia di mas ku 1000 dòkter i sientifikonan den 87 pais. ISCoS a disidí di pone un Dia Internashonal di Dwarslaesie dia 5 di sèptèmber, ku e meta pa oumentá e konsiensia den komunidat. Ta antisipá ku e konsiensia riba esaki lo fasilitá un inklushon di personanan ku limitashon físiko den komunidat i tambe ku e ta yuda programanan di prevenshon.
Haña dwarslaesie ta e suseso mas devastador den bida di un ser humano. E funshonnan sentral den e kurpa ta keda afektá i e kordinashon entre e funshonnan ta difísil òf a bira imposibel ku ta trese ku ne ku e persona ku dwarslaesie tin ku dil ku desafionan hopi grandi. E Organisashon Mundial di Salu (WHO) huntu ku ISCoS a pone forsa huntu pa alsa e konsiensia bou di outoridatnan di salú i komunidat. Un di e inisiativanan tabata publikashon di e reportahe ‘International Perspectives on Spinal Cord Injury’ na desèmber 2013. Leshon den bo kolumna vertebral por sosodé tur kaminda i tur hende por haña un dwarslaesie. Pesey ta importante ku e maneho di dwarslaesie ta haña su debido atenshon i ku rònt mundu e konsiensia relashoná ku prevenshon di dwarslaesie ta bini den “spotlight”.
Den hopi kaso por prevení dwarslaesie i tin diferente strategia disponibel. E resultado di rehabilitashon di dwarslaesie ta dependé di konosementu, kompromiso i koperashon. Ora tin un kalamidat, esfuerso èkstra ta nesesario. Pone forsa nashonal i internashonal huntu por hasi un diferensia.
Dwarslaesie i e parálisis ku e tin komo konsekuensia tin un efekto devastador riba e areanan físiko, sosial, seksual i edukashon pa esun ku a haña dwarslaesie. Banda di esey e ta subi e karga ekonómiko-finansiero di e persona ku dwarslaesie i tambe pa e personanan rònt di dje ku e ta dependé di dje. Segun estadístika di Merka, dependiendo di e seriedat, un persona heridá por kosta den e promé aña entre $334.000 te $1.000.000. E gastunan durante e añanan siguiente por ta entre $41.000 a $178.000. No semper ta mala suerte ta kousa di dwarslaesi. Den hopi kaso ta negligensia, mal kondukta, ignoransia òf simplemente mal trabao.
E meta ta pa un persona ku dwarslaesie biba un bida mas inklui den komunidat. Dor di e parálisis permanente via un leshon kompletu, prevenshon tin un importansia hopi grandi. E dicho “Prevení ta mihó ku kura” ta importante, pero de hecho den e kaso di dwarslaesie “Prevení ta kura”.
ISCoS ta promové e standardnan mas haltu di atenshon pa personanan ku tin dwarslaesie den henter mundo. Via su ekiponan multidisiplinario di dòkternan i otro profeshonalnan, ISCoS ta dediká na promové edukashon, investigashon i ekselensia klíniko. Pues, e úniko mas apropia ku ISCoS por hasi ta tuma e inisiativa ku por tin e potensia pa un impakto signifikante den mundo. ISCoS ta aserkando instansianan mundial manera WHO, VN, UNICEF, ets. pa deklará dia 5 di sèptèmber komo dia ofishal di Dwarslaesie.
Fundashon Alton Paas ta kere den e abilidat, derechi i debernan di kada persona ku dwarslaesie. Tur persona ku dwarslaesie mester haña e oportunidat pa dediká na nan salú físiko i mas pa mantené i optimalisá nan abilidatnan i nan funshonnan pa proveé pa nan mes i nan komunidat. Fundashon Alton Paas ta dediká pa krea e oportunidatnan ey pa e persona ku dwarslaesie por alkansá lo máksimo.
Pa e motibu ey ku hopi plaser nos ta uni nos mes ku ISCoS pa honra dia 5 di sèptèmber komo Dia Internashonal di Dwarslaesie ku e meta pa para ketu na inkluí hendenan ku dwarslaesie mas den komunidat.
E programa di televishon SUPERANDO ta keda lansá den luna di sèptèmber i tin un durashon di 12 siman ku kada siman un programa di mei ora. E programa ta pasa via kanal 8 Telecuracao riba djasabra pa 6:00’or di atardi kuminsando dia 10 di sèptèmber 2016 i na kanal 11 CBA riba djamars pa 10:00 pm kuminsando dia 6 di sèptèmber 2016.