WILLEMSTAD – Unabes paranda kuminsá … mas hende ta bula aden. Despues di e éksito grandísimo di Randal Corsen Big Band djadumingu último komo klousura di e fiesta 100-100 di Maduro & Curiel’s Bank, e kantante Dibo Doran awor tambe den e konsierto Paranda di Fin di Aña di djaweps anochi 29 di desèmber awor na Brakapoti Mei Mei.

Lo bira un anochi yen di músika adekuá pa e kambio di aña ku un toke di nostalgia. Lo tin un kinteto di kantante, pasobra banda di Dibo Doran lo tin Yumarya Grijt, Richie Rich Pieter (ámbos a kompañ’é kaba djadumingu tambe), Ñaño Rosario i komo invitado spesial Izaline Calister.

Apesar di su edat, Dibo Doran no ta niun nobato. El a sigui e pasonan di su tata Gibi Doran ku mas ku 20 aña ta hopi eksitoso ku su banda Gio Fuertisimo. Dibo ta popular bou di e hóbennan i un kantante gustá na e anual festival di tumba. Eksitosamente Dibo ta traha un karera di su mes den su propio direkshon mas moderno, pero djadumingu el a demostrá ku e por interpretá piesanan di ántes tambe hopi bon.

Pa karchi di entrada (na rason di 75 florin) por akudí na e ofisina di Fun Miles, Mensing’s Caminada i Van Tweel na Zeelandia i Jan Thiel. Esaki ta primintí atrobe di bira un anochi dibertido ku músiko i kantantenan ku ta duna lo mihó na un públiko buenagradesidu.