E fenomeno di All-inclusive ta un tendencia mundial. Varios destinacion a conoce hopi consecuencianan negativo pa falta di un vision y purba frena e fenomeno prome cu ta laat.

Tin varios articulonan cu a keda publica cu e consecuencianan cu por tin di crecemento di inventario di All-inclusive sin control.

Den un otro articulo di Tourism Concern ta papia di un cantidad di estudionan cu ta mustra e consecuencianan. Hopi di e agencianan di biahe cu ta bende plannan vacacional ta prefera di bende nan paketenan cu ta inclui acomodacionnan All-inclusive. Pero kico e crecemento di e fenomeno di modelo All-inclusive, unda e turista ta practicamente wordo invita pa “laga nan cartera na cas”, ta nifica pa e pais cu ta e destinacion.

Segun e articulo di Tourism Concern, na Majorica ta culpa e fenomeno di All-inclusive di ta motibo cu  hopi negoshinan local a cera nan porta. Den September 2011 negoshinan local a organisa un protesta nacional contra acomodacionnan All-inclusive. Na Turkia un investigacion a conclui cu 10% di locual e turista, cu ta keda na un acomodacion All-inclusive, ta gasta na su plan vacacional ta logra keda den e economia di e pais, esaki sin a pasa directamente via e negoshinan local. Na Mombasa, Kenya, “World Bank” a declara cu All-inclusive ta e negoshi cu menos ta beneficia e economia di Kenya. 87% di e turistanan cu ta bishita Kenya ta scoge pa keda na un All-inclusive, y net un poco mas cu mita di e habitantenan ta biba cu menos cu $1 pa dia. Na Jamaica hotelnan All-inclusive a atrae turistanan a termino corto pero a blokia desaroyo di otro tiponan di turista. Na Republica Dominicana All-inclusive ta wordo culpa pa percura cu restaurantnan local a cera y un crecemento di un actitud negativo pa cu turistanan. Y na Goa, India, taxinan local y tour busnan a perde negoshi pa motibo di e fenomeno di All-inclusive. Esaki ta algun di e diferente estudionan haci pa cu e efectonan cu e fenomeno di All-inclusive tin riba paisnan cu a pone cu entre otro Tourism Concern a dicidi di lanta un campaña di conscientisacion. Cu argumentonan simpel e articulo ta ilustra e efectonan negativo di All-inclusive manera entre otro riba aspectonan laboral. Den un rapport conduci pa Tourism Concern tin como conclusion cu hotelnan All-inclusive no ta reconoce nan empleadonan nan derecho di representacion sindical, hopi di e empleadonan tin falta di entrenamento, nan ta wordo presiona pa traha un cantidad halto di overtime sin ricibi e pago debido y esaki sin tin un salario adecuado. Adicional e entrada cu lo por compensa cual ta tips pa e empleadonan ta menos den e tipo di hotelnan aki mirando cu e turistanan no ta biaha cu mucho placa pa gasta y como consecuencia ta traduci den reduccion substancial den e entrada salarial di e empleadonan. Tourism Concern a ricibi hopi rapportnan expresando rabia y frustracion di gobernantenan y di asociacion di hotelnan di Turkia describiendo con nan ta wordo presiona di agencianan di biahe di UK pa transforma nan hotelnan den acomodacionnan tipo All-inclusive. Otro negoshinan local, manera restaurantnan, taxi tur ta perde cu e modelo di All-inclusive mirando cu ta trata aki di turistanan cu no ta sali for di hotel. Na algun destinacion negoshinan a haya nan forsa di cera y tin como consecuencia cu turistanan mester depende di paketenan di cama y desayuno mirando cu tin menos alternativa cada biaha. Comerciantenan di entre otro Spaña, Cyprus, Kenya, St. Lucia y Jamaica tur ta keha di no por mantene nan negoshi habri pa mucho tempo mas mirando cu e cantidad cu ta sali for di e hotel ta asina minimo.

Turismo actualmente ta e unico pilar economico di nos isla ilustrando e dependencia halto cu nos tin riba e industria aki. Locual Gobierno di Aruba kier haci ta mantene un balansa saludabel cu a bin ta beneficia nos te cu awor y a proba di ta exitoso. Mirando e ehempelnan aki unda diferente estudionan ta mustra e consecuencianan cu All-inclusive por tin si no tin control, mester percura pa bienestar di nos isla y nos hendenan prevalece.