10,000 florin pa komunidat di Kòrsou!

WILLEMSTAD:-  Den kuadro di selebrashon 10 aña di Digicel a duna komunidat oportunidat di registrá un organisashon non-profit ku e meta di risibí un donashon for di Digicel. Por a hasi esaki dor di a bai riba e websáit di Digicel i yena un formulario na unda ku e usuario ta duna nòmber di e organisashon òf fundashon ku e ta kere meresé di risibí un donashon di 1,000 florin di Digicel. A pidi komunidat pa vota pa nan organisashon òf fundashon faborito.

Total, Digicel a repartí 10,000 florin entre e 10 organisashonnan non-profit. Tabatin 66 organisashon/ fundashon ku a inskribí; a selektá e ganadornan basá riba esnan ku mas voto a risibí. E organisashon/ fundashon nan ku a resultá ganador ta Ban Duna un Man, Fundashon Seru Fortuna, Fundashon Alzheimer, Fundashon Motivá Guia i Protehá, Fundashon Nos Grandinan, Fundashon Pro Bista, Ronald McDonald House Charities, Stichting Dog, Hospice Arco Cavent i Fundashon Proyekto un Futuro Briante. “Tin hopi organisashon non-profit ku ta hasiendo un tremendo trabou den nos komunidat, Digicel ta kontentu di por aportá ku nan kousa. Durante di e último 10 añanan Kòrsou por a konta ku Digicel, ademas di kontribuí na ekonomia di Kòrsou, kreando kuponan di trabou i desaroyando talentonan nobo nos a pone nos skouder bou di diferente proyekto sosial i organisashonnan ku tin un impakto positivo den bida di e yu di Kòrsou. Nos ta konfia ku e donashon aki lo yuda kada un organisashon den nan esfuerso pa realisá nan metanan ”, esaki di akuerdo ku Direktor di Digicel sr. Sten van der Ham.