WILLEMSTAD/ NOVEMBER 2013:- Den fin di siman tras di lomba Digicel a paralisá Brionplein ku nan aserkamentu inovativo i diferente na e kliente. E akshon dediká na e promoshonnan di ‘One Rate’ a resultá un éksito rotundo. Sin promoshon previo, Digicel a instalá un sètùp masha atraktivo na Plaza Brion unda ku públiko tabata tin oportunidat di gana un Samsung S4 i un Blackberry Q10 partisipando na e asina yamá ‘One Rate Challenge’. Un kantidat grandi di hende a hala serka pa tuma nota di loke ta pasando. Pa partisipá na e ‘One Rate Challenge’ e persona mester ta un kliente di Digicel, seguidamente e partisipante mester primi e boton kòrá ku ta aktivá un ‘timer’ di 60 sekònde, durante di 60 sekònde e partisipante mester a papia sin wòrdu interumpí uzando únikamente 1 bes e palabra ‘one rate’ ‘Digicel’ i ‘ 44 sèn’. Tampoko no tabata pèrmití pa e partisipante uza e palabranan ‘anto’ i ‘pero’. E partisipante mester finalisá e kombersashon den eksaktamente 60 sekònde. E promé ganador a risibí un Samsung S4, un otro persona ku tambe a yega hopi serka di e sekòndenan determinante pa e premio a wòrdu premiá ku un DL600 pa su esfuerso, ademas di esaki tur otro partisipante ku a purba nan suerte tambe a risibí un opsekio. E ‘One Rate Challenge’ a konta ku animashon di MC Monty i transmishon di Radio Active i 88 Rockorsou. Hopi tabata esnan ku a para den rei pa risibí un chèns di partisipá. Bishita e página di Facebook di Digicel pa mas foto di e evento di djasabra último na Brionplein.