A laga Baya Beach i besindario limpi limpi!

WILLEMSTAD-SEPT: Esaki ta e di 2 aña konsekutivo ku Digicel ta djòin e proyekto di Curaçao Clean Up; aña pasá Digicel a uni forsa i adoptá Playa Canoa i besindario komo área di limpiesa. “Komo empresa nos a bin ta konsientisá nos komunidat riba limpiesa i medioambiente, esaki nos ta hasié internamente serka nos empleadonan pero tambe via di proyektonan komunitario, esaki mes ta motivá nos pa un bes mas aportá komo empresa na e akshon di Curaçao Clean Up”, esaki di akuerdo ku relashonista públiko pa Digicel Kòrsou, Thessa Fleming. E aña aki, Digicel a adoptá Baya Beach i besindario. Un grupo grandi konsistiendo di empleado, famia i amigunan a presentá na e punto di enkuentro pa huntu hasi e área limpi. Ku animashon di Dj RO-1 tur hende a partisipá aktivamente na e akshon di limpiesa. E akshon aki, ademas di aportá na bienestar general di nos pais a pèrkurá pa estrechá lasonan di amistat i kolegialidat entre tur esnan ku a partisipá. A kuminsá mainta bon trempan i ya pa tra’i mèrdia mayoria di e trabou a wòrdu hasí i a laga e tereno limpi pa bishitantenan por sigui disfrutá. E aglomerashon di sushi despues di e limpiesa tabata kuantioso. “Nos ta felisitá e organisashon di Curaçao Clean Up ku e inisiativa i tur esfuersonan hasí pa realisashon di e akshon di limpiesa mas grandi ku nos isla a konosé. Danki tambe na tur ku a djòin e team di Digicel ”, asina Fleming di Digicel a tèrminá.