Digicel Aruba ta casi cla cu actualisacion di su red


Ya caba ta na 90% di e proyecto. Lo drecha cobertura den algun area y garantisa mas y miho servicio di “mobile broadband”

ORANJESTAD, Aruba – 6 di December 2017: E compania ZTE ta expandiendo rednan di 4G LTE den un total di 26 mercado di Digicel den henter Caribe y Centro America. Cu e infrastructura aki instala, Digicel lo por ofrece mas y miho servicio di “mobile broadband” na tur su usuarionan den henter e region. E solucion LTE ta inclui e servicionan existente awor di 2G y 4G, pues e ta haci posibel cu na un manera efectivo, por mantene y maneha tur tres red den forma simultaneo.

Algun luna pasa Digicel, na nivel mundial, a start cu un programa cu a haya e nomber di “Digicel 2030 Global Transformation”, den cual ta pone e cliente den control y ta actualisa nan red den uno super lihe, moderno y eficiente. Den e proceso a cera un partnership cu “ZTE” den cual ta conduci un programa pa sigui actualisa e rednan di Digicel den forma continuo.

Ultimo simannan sinembargo e trabounan di “upgrading” aki ta causando inconveniencia na usuarionan, cu varios interupcion di yamada of data cu ta bira limita. “Locual ta pasando ta cu practicamente nos ta cambiando henter e red pa e plataforma ZTE. Normalmente trabounan asina ta tuma hopi tempo, entre 6 luna pa 1 aña, pero nos ta haciendo e mas lihe posibel”, asina Wanda Broeksema, CEO di Digicel Aruba a splica awe.

Pa por keda cla mas lihe, ta trahando 24 ora pa dia riba e red, haciendo uzo di varios ekipo, cu ta permiti trabounan keda cla rapido.

“Digicel ta haciendo tur lo posibel pa minimalisa e impacto riba nos usuarionan, dor di implementa e cambionan mas grandi den un solo periodo, cu a cuminsa fin di october y cu awor ta casi cla”, asina Wanda Broeksema a duna di conoce. “Nos ta awor na 90% di henter e proyecto, incluyendo e cambionan grandi den e red y riba tur e mas di 30 cellsitenan situa strategicamente tur rond di nos isla”.

Ainda tin algun area cu no ta cla y cu ta den e 10% cu ainda falta pa actualisa e sistema. E areanan aki ta den cercania di Bakval, Tanki Leendert, Simeon Antonio, Parkietenbos y Pos Chikito. “Nos ta masha orguyoso di anuncia cu den e trabounan di actualisa nos red, cu nos ta drechando e cobertura di nos usuarionan den e areanan di Paradijswijk, Hato, Cura Cabay y Barcadera”, segun e gerente di Digicel Aruba a informa awe.

E lansamento oficial di e red di LTE lo tuma luga pronto, lo laga publico sa adelanta, ora cu trabounan ta 100% cla. Ta bon pa sigura clientenan cu durante dianan di fiesta lo no traha riba e red, pues por haci yamada y uza data sin ningun problema!

Preparacionnan pa e trabounan aki a cuminsa desde mita di aña caba pero lamentablemente, pa motibo di horcan den Caribe, cu a cay atras cu e trabounan, specialmente pasobra carga tabata dificil pa yega nos isla.