Tabata djaluna anochi durante di un enkuentro ku prensa i demas invitadonan na Vegas 360 ubiká na e Curaçao Beach Boulevard na Mambo Beach ku Digicel Kòrsou a lansa e modelo di mas nobo di e popular telefon.  E BlackBerry Z10 ta e promé smartphone  rediseñá i konteniendo teknologia nobo ku ta keda lansá riba e plataforma di BlackBerry, ofresiendo nan klientenan un eksperensia úniko. E BlackBerry Z10 ta e modelo di mas lihé den su sorto i ku kontinuamente lo bai ta adaptando na nesesidat di e kliente, sea ta negoshi òf plaser. “Nos ta mashá kontentu di por bai ofresé e BlackBerry Z10 smartphone for di Djamars 23 di Aprel na nos klientenan den merkadonan di Caribe. Klientenan por bai disfrutá di e último den teknologia i ‘Apps’ (aplikashonnan) tur den un solo unidat; nos ta sigur ku tin gran espektativa pa e modelo nobo di BlackBerry aki”, asina Sra. Caitriona Hayes, Hefe di merkadeo pa Digicel Dutch Caribbean a komentá resientemente. Durante di e lansamentu ofisial, un representante di RIM tabata presente pa duna un presentashon i eventual splikashon riba e telefon nobo. “E BlackBerry Z10 smartphone ta ofresé un plataforma nobo i potente na tur kliente, kombiná ku e plannan i paketenan di servisio ku Digicel tin pa ofresé, klientenan lo eksperensiá un manera úniko di komuniká, opshonnan pa hasi multiple tarea na un solo momentu, akseso lihé i fásil na retnan di komunikashon sosial i e seguridat ku e plataforma di BlackBerry ta ofresé”, esaki di akuerdo ku Sr. Andrew Persaud, Territory Sales Manager – Caribbean pa RIM. Digicel Kòrsou awor ta ofresé e BlackBerry Z10 den nan establesimentunan i ta optenibel ku diferente pakete di servisio. Riba fotonan athuntu por haña un impreshon di e enkuentro ku prensa i demas invitadonan na Vegas 360 djaluna último.