CEO Digicel, Sr. Hans Lute “Huntu komo empresa por logra un impakto mas grandi”

Willemstad, Curaçao – Tabata durante di e temporada di karnaval ku Digicel i InselAir a djòin pa rekoudá fondo pa e fundashon Special Olympics Curaçao. Kada pakete ku a wòrdu bendí lo a nifiká un donashon di 15 florin pa Special Olympics. Manera tur hende por kòrda, e akshon aki a resultá den un gran éksito. Tabata resientemente ku ámbos empresa a hasi entrega di e fondonan na e organisashon. “Nos ta masha kontentu ku InselAir a forma parti di e proyekto dediká na Special Olympics. Esaki ta demostrá ku den union tin forsa i ku huntu komo empresa por logra un impakto aun mas grandi”, esaki di akuerdo ku Sr. Hans Lute, CEO Digicel Dutch Caribbean. E fondo rekoudá lo bai pa sigui sostené e atletanan spesial den nan entrenamentu pa e próksimo Olympiada Special ku ta tuma lugá na Los Angeles na 2015. Huntu ku InselAir a rekouda Naf. 9195,= atraves di benta di pakete, agregándo loke ku a rekoudá for di benta di e armbantnan ‘Be Special, Be Extraordinary’ Naf. 2425.39 i ta yega na un suma total di Naf. 11.620,39. “Digicel su envolvimentu ku Special Olympics no ta di awor aki, sino ta un relashon di hopi aña kaba. No únikamente Digicel ta patrosinadó mayor di Special Olympics riba diferente isla na unda ku e tin su operashonnan, pero tambe ta kompartí e vishon, ideologia i meta di e fundashon. Esaki mes ta un di e motibunan prinsipal pa ‘pone man na obra’ i yuda e organisashon rekoudá fondo pa realisá nan otro proyektonan tambe”, asina Lute a kontinuá.