Atletanan a risibí 20,000 florin

WILLEMSTAD: Resientemente Digicel a renobá su kompromiso ku Special Olympics Curaçao. Esaki ta un kompromiso ku Digicel tin den tur merkado. E patrosinio ta mas ku un sosten finansiero. Digicel Kòrsou ta masha kontentu di por kontribuí un biaha mas ku atletanan di Special Olympics. E aña aki ta pendiente pa e Special Olympics  Summer Games dianan 10 i 11 di yüni na Southern California.

Digicel Kòrsou su patrosinio na e organisashon ta bai kompañá ku un laso di koperashon ku ta keda sostené den transkurso di henter aña; asina por menshoná ku e muchanan di Special Olympics ta risibí aporte spesial pa partisipá na entre otro kampeonatonan internashonal, aktividatnan di formashon personal i sosial, pero tambe por konta ku un sosten inkondishonal di maneho di e kompania. Ta konosí ku fundador di Digicel Group, sr. Dennis O’Brien ta fiel sostenedó di e organisashon di Special Olympics mundialmente i Kòrsou no ta un eksepshon.

Digicel Kòrsou ta deseá e atletanan spesial hopi kurashi i eksitoso durante di nan entrenamentu pa nan partisipashon na  Southern California. Riba foto athuntu por tuma nota di entrega di e cheque ku a tuma lugá resientemente na Digicel Biesheuvel.  Un montante di Fl.20,000 a wòrdu entregá dor di Sr. Sharvelo Felomina di departamentu di Marketing di Digicel Kòrsou na representantenan di Special Olympics Curaçao. Keda pendiente pa e fundraising di Special Olympics ku lo tuma lugá dia 27 Aprel próksimo durante e Koningsmarkt den Punda.