Un aporte importante na un fundashon kerí den nos komunidat

WILLEMSTAD; Resientemente Digicel Kòrsou a renobá su patrosinio ku e organisashon di Special Olympics, di e forma aki siguiendo un tradishon di años ku e kompania tin- no únikamente na Kòrsou sino den kasi tur merkado na unda e ta operá. E atletanan di Special Olympics semper a forma parti di e aktividatnan, kampañanan i trabounan komunitario di Digicel. E kompromiso di e kompania pa ku Special Olympics ta genuino i duradero. E aña aki, Digicel Kòrsou ta pone un montante di NAf 30,000 disponibel pa e organisashon. Tur esaki pa yuda nan den preparashon di e atletanan i finalisá detayenan pa nan biahe na 2015 den representashon di Kòrsou na e weganan olímpiko ku próksimamente ta tuma lugá na Los Angeles California. Digicel Kòrsou su patrosinio na e organisashon ta bai kompañá ku un laso di koperashon ku ta keda sostené den transkurso di henter e aña; asina por menshoná ku e atletanan ta risibí aporte pa entre otro aktividatnan di formashon personal i sosial, pero tambe por konta ku un sosten inkondishonal di maneho di e empresa. Tambe por menshoná algun akshon pa rekoudashon di fondo ku tabata tin durante di e aña aki; e benta eksitoso di e popular armbantnan ‘Be Extraordinary’ i tambe e stènt spesial kant’i ruta di karnaval. “E meta prinsipal tras di un patrosinio asina signifikante ta pa brinda e atletanan oportunidat di desaroyá den forma positivo i kultivá un deseo pa sobresalí den nan deporte”, esaki di akuerdo ku srta. Thessa Fleming representante di Digicel Kòrsou.