E biaha aki ku enfoke riba nutrishon, balor i konfiansa propio, disiplina i moveshon físiko

WILLEMSTAD- Mart 2014; Digicel ta klá pa un otro edishon di Skolnan Ekstraordinario. E proyekto aki ta pone atenshon na siña e hóbennan kon pa kome i move, pensa i aktua salú. “E sentimentu ‘ekstraordinario’ lo mester keda kultivá den tur gremio i organisashon di nos komunidat. ‘Skolnan Ekstraordinario’ ta un plataforma ideal pa ta mas serka di e hóben i di e forma ei inspir’é pa e ta tur dia aún mas ekstraordinario. E biaha aki nos a sinti nesesidat di enfoká riba nutrishon, balor propio, konfiansa propio, disiplina i moveshon físiko. Spesialmente den e tempu di awó, nos komunidat mester di hóbennan ku ta deseá di ta modelonan di un komunidat positivo”, esaki di akuerdo ku ehekutivo di merkadeo pa Digicel Kòrsou, Thessa Fleming. E proyekto aki ta keda sostené dor di Live Healthy Curaçao, ku lo ta enkargá ku e parti di splikashon i práktika di e studiante. Skolnan ku partisipá lo siña tokante di komementu saludabel, práktika di deporte i su importansia- den totalidat e hóben lo risibí informashon riba kon pa kondusí un bida saludabel. Lo bishitá 5 skol; Kolegio San Hohe, Kolegio Nechi Pieters, Kolegio Bellefaas Martis, Kolegio Iris Bruyning i Glorieux College. E promé kabesantenan di skol tabata sumamente interesá i entusiasmá ku e aserkamentu di Digicel pa ku e proyekto. Riba kombinashon di foto por mira e komienso di e proyekto ‘Skolnan Ekstraordinario’ durante e promé enkuentro ku e hóbennan.