Resientemente Rotary Club Willemstad a kambia direktiva. Durante un resepshon informal na Avila Hotel presidente saliente Franco Diaz a pasa timon pa Focco Lunsingh Scheurleer. Den e periodo 2013-2014 mundialmente e tema Engage Rotary, Change Lives ta pará sentral pa tur klup di Rotary. Rotary Club Willemstad den e tema akí ta enfoká espesífikamente riba hubentut di Kòrsou.  Esaki ta nifiká ku e klup, guia pa Focco Lunsingh Sheurleer, den e próksimo periodo ta organisá diferente proyekto pa i huntu ku komunidat di Kòrsou pa sostené hóbennan i e organisashonnan ku ta sostené nan. Proyektonan importante ku ta bini bek tur aña ta entre otro “Rotarrally” i Dare to wear a Beard” ku ta eventonan pa rekoudá fondo. Tambe tin e Rotary Youth Leadership Award (RYLA) kaminda mas o ménos 30 alumno lokal di diferente skol ta partisipá un wikènt largu na un programa di liderazgo i teambuilding. Ku nan rekoudashon di fondo i proyektonan hands on Rotary Club Willemstad ke trese kambio positivo den bida di hende kaminda esei ta nesesario i kaminda e service club por ofresé un kontribushon konkreto. Focco Lunsingh Scheurleer na final di su diskurso: “Nos mester apliká Rotary i su balornan entre otro servisio den tur aspekto di nos bida: asina no solamente bidanan di esnan ku nos ta yuda ta kambia, sino nos mes bida tambe.” Pa e próksimo periodo direktiva di Rotary Club Willemstad ta konsistí di : Focco Lunsingh Scheurleer (presidente), Raoul Hooftman ( sekretario), Pim Steinmeijer (tesorero), Rita Merkies (presidente entrante), Franco Diaz (presidente saliente)  Bert aengenendt (club services), Maya Mathias (vocational services), Pamela Nas-Winkel (Community Services) Chris Winkel (International Services), Igorr Hieroms (new generations) i Paul Kok (Sergeant at arms). A lanta Rotary Club Willemstad na 2002 i nan tin 38 miembro. E klup ta reuní tur djaluna atardi durante oranan di lunch den Avila Hotel i ta parti di Rotary International ku 1.20 mion miembro, partí entre 160 pais.

Potret: direktiva nobo di Rotary Club Willemstad, ku na man robes presidente saliente Franco Diaz i  di 2 persona na man drechi  presidente nobo Focco Lunsingh Scheurleer.