WILLEMSTAD- Ougùstùs 2013 – For di dia 9 pa 15 di ougùstùs último, direktiva di DAN tabata di bishita na Kòrsou, esaki enkonekshon ku nan reunion anual. DAN ta e asosiashon mas grandi di buseo rekreashonal dediká na seguridat di scuba diving i ta proveé asistensia na momentu di emergensia rònt mundu. Durante di nan estadia na Santa Barbara Golf and Beach Resort, nan a dùik den área ku Ocean Encounters Diving i komo parti di e programa prepará dor di CHATA Dive Task Force nan a bishitá e tanki di dikompreshon ku a kaba di wòrdu instalá. Dr. Winkel, direktor di SEHOS a duna un introdukshon i splikashon di e asina yamá ‘Decompression Chamber’. Despues di esaki, e delegashon a bai e ouditorio di Sea Aquarium na unda ku Dan Orr a duna un charla tokante seguridat di buseo, pa finalisá e enkuentro CTB a prepará un ‘happy hour’ na Augusto’s. Mas di 70 persona, inkluyendo representantenan di diferente sentro di buseo na Kòrsou a haña oportunidat di sera konosí, kòmbersá i nètwèrk ku otro. Esnan ku a forma parti di e DAN Group tabata, Presidènt i CEO, Bill Ziefle, Presidènt di DAN Foundation Dan Orr i diferente selebridatnan manera e.o Michael Lang, Sylvia Earl, Kathy Weydig, Jul Ziefle, Lee Seliski, dòkternan Bill Anylan i Wayne Massey, abogadonan Joe Poe and Doug Stracener, Brad Lally, Rachelle Deal, Virginia Parker, Panchabi i Harry Rodgers. E organisashon di DAN ta konsiderá e bishita aki masha importante, primariamente debí na e responsabilidat di nan organisashon i e kredibilidat serka nan miembronan.