Willemstad – Djaweps 26 di yanüari ta Dia Internashonal di Duana. Pa e okashon aki Duana na diferente pais, pa medio di un dekreto gubernamental i te kaminda trabou ta permití, lo tin un dia liber. Riba e dia aki Duana lo no por duna servisio usual di atendé importashon, eksportashon i servisio di tránsito di karga. Sierto partinan di Duana lo duna servisio limitá na kliente. Relashoná ku esaki ta supliká usuarionan di servisio di Duana pa tuma bon nota di e kambio temporal aki.

Na e islanan ku ántes tabata Antia Hulandes ta un tradishon pa organisá Siman di Duana ku diferente aktividat. Esaki ta tuma lugá tur aña na un otro isla. E aña aki selebrashon di Siman di Duana ta tuma lugá na Boneiru ku un parti ofisial, un parti di reflekshon riba e funshon importante di un Duanero pa su pais i tambe lo tin aktividatnan deportivo i sosial. Durante e selebrashon aki Duaneronan lo interkambiá tambe di nan eksperensia personal i di e organisashon ku nan koleganan di otro isla.

Pa loke ta servisio na kliente esei ta nifiká ku gran parti lo ta será. Kaminda trabou no ta pèrmití lo tin algun adaptashon na e diferente pòstnan di Duana. Pa evitá ku klientenan ta haña nan ku sorpresa ta spesifiká aki bou e situashon di kada pòst. Duana lo informá tur su klientenan tambe via mail i via su sistema outomatisá di karga Asycuda.

Duana na Nieuwehaven lo ta será pa públiko. Solamente e parti di waf di kònteiner lo ta habrí pa tráfiko di kònteiner.

Duana na Aeropuerto lo sigui duna servisio na biaheronan. E parti di Swissport, esta karga via avion, lo ta será. Lo duna servisio solamente na e parti di eksportashon di Swissport. E parti di Curinde na Zona Liber tambe lo ta será.

Duana na Punda lo ta será pero a adaptá e orarionan di trabou e siman aki pa asina por sigui brinda servisio di Vigilansia i Marítimo. Pa loke ta trata servisio di Duana na Pòstkantor, a akordá ku e instansha ku lo no duna servisio djaweps awor. Duana Kòrsou ta supliká tur kliente, deklarante, personanan ku a importá produkto i biaheronan pa tene kuenta ku e kambionan menshoná aki riba. Ta bon pa tene kuenta ku lo no por deklará ningun karga riba djaweps 26 di yanüari awor. Ku adaptashon di e skema di trabou Duana lo sigui kumpli ku su trabou di vigilansia i di kòntròl.