Willemstad – Resientemente e federashon di barkunan krusero, FCCA( Florida Caribbean Cruise Association), a tene un kompetensia entre muchanan di 6 pa 16 aña di Karibe. Minister Palm den su enkargo komo minister di ekonomia i turismo, a bishita diferente skol pa asina promové i enkurashá nos hóbennan pa partisipá na e kompetensia aki kual tabata enserá skirbi un komposishon ku e tema “dikon ta importante pa barkunan krusero bishita mi isla”. Di e diferente skolnan a saka dos ganadó ku a bai kompetí kontra e otro hóbennan di Karibe. Minister Palm ta orguyoso di anunsiá ku e dos hóbennan Darimar Weert ( Juan Pablo Duarte VSBO) I Catherine Ribeiro ( International School of Curaçao) tur dos a kai den premiashon den nan kategoria I a risibí un check di parti di e organisashon FCCA. Minister Palm a bishita e skolnan pa asina anunsiá esaki na e hóbennan I entrega nan e check. Turismo ta un pilar importante pa e ekonomia di Kòrsou I Minister Palm ta sigur ku e tipo di kompetensianan aki lo enkurashá i stimulá nos hóbennan i skolnan pa enfoká mas riba e sektor aki.