Pelíkula ta generá 20 mil pa Ride for the Roses

WILLEMSTAD – Ayera nochi den The Cinemas na Riffort a tuma lugá e promé evento di fundashon Ride for the Roses Curaçao (RFTRC) pa generá fondo pa PWF (Prinses Wilhelmina Fonds). I na e promé evento aki mesora por a transferí alrededor di 20 mil florin riba kuenta di Ride for the Roses na Orco Bank. Dia 29 di yanüari 2017 tin e di 13 edishon di e Ride, Sail, Swim, Walk, Spinergy & Climb for the Roses kaminda ta antisipá atrobe mas ku 10.000 partisipante pa rekoudá plaka pa e bon kousa.

Benta di karchi pa e pelíkula Sully a bai dje bon ei ku kasi dos siman di antemano tur a bende. Di e forma aki a yena dos sala di The Cinemas ku un total di 420 persona ku asina a kontribuí, pero a brinda nan tambe un anochi dibertido. Riba un tapeit kòrá a risibí e wéspetnan i a ofresé nan pasapalu i un glas di bubbles pa hinka nan den ambiente pa e estreno lokal di e pelíkula Sully, dirigí pa Clint Eastwood i ku Tom Hanks den e papel prinsipal.

Riu Hudson

Despues di algun palabranan na apertura di presidente Robbin Martina di fundashon Ride for the Roses e komersiante i anterior purser di ALM Tobias ‘Tito’ Cordeiro a papia riba e aksidente fatal di avion di dia 2 di mei 1970 den laman na 60 kilometer for di kosta di e isla St. Croix den e parti ost di Karibe. E tabata pertenesé na e grupo di sobrebibiente, pero 23 persona a fayesé, entre nan su kolega e aeromosa Margareth Abraham. Esaki tabata un storia di un sobrebibiente ku sierto similaridat ku pashènt di kanser ku logra sobrebibí nan malesa.

Seguidamente a mustra e pelíkula Sully, basá riba e storia real di kapitan Chesley ‘Sully’ Sullenberger di US Airways ku dia 15 yanüari 2009 a skapa bida di tur 155 hende na bordo ora el a hasi un aterisahe di emergensia den e riu Hudson na New York despues ku ámbos motor a kai afó ora para a dal den nan, apénas algun minüt despues ku a lanta buelo. E asuntu a bira mas dramátiko ora durante e investigashon ku a sigui a sugerí ku e aterisahe di emergensia no tabata nesesario. Finalmente a sali na kla ku esaki tòg tabata e úniko opshon ku a resta e kapitan.

Di-13 Ride for the Roses

Asina a kibra e eis pa e aktividatnan di fin di yanüari 2017. E fundashon Ride for the Roses ta wak bèk ku satisfakshon riba e promé aktividat pa e kampaña di 2017 i ta gradesido na tur ku a duna nan kontribushon.