Rotary Club Willemstad (RCW) ta organisá djadumingu 26 di mart su proyekto di fundraising annual yamá Rotarally, kual e aña aki lo start entre 12’or i 12’or i mei na parkerplats di Guardian. E rally aki ta pasa na kamindanan spesial i menos konosí rònt Korsou i ta rekauda fondo pa un bon kousa. E anja aki tur fondo lo bai pa Bikes4Kids ku ta duna mucha di famia ku menos rekurso un baiskel I ta siña nan kore e baiskel un manera seif. Por kumpra karchi via di ticketscaribbean.com, e kamindanan konosi i serka miembronan di Rotary Club Willemstad.

Paseo di pùzel
Rotarally ta un paseo di pùzel kaminda un i tur por partisipá. E ta kuminsá entre 12.00 i 12.30 na parkerplats di Guardian na Cas Corawegi ta terminá na Hòfi Rust & Burg (Asiento). Manera tur aña lo tin tantu e Paseo di Pùzel, komo pa e muchanan e konkurso popular Tooby Rotarally. Partisipantenan na e Rally, ku ta hopi great pa hasi ku bo famia, gruponan di amigu of tim di trabou, por gana premionan bunita manera ticket di biahe.

Kontribushon pa kada outo ku ta partisipá ta f 125,- i por kore e ruta gewon den outo di famia. Na final di e paseo partisipantenan por sigui gosa di un BBQ sukulento i di dushi muzik na Hòfi Rust & Burg. E suma di 125 florin ta inkluí dos voucher pa e BBQ aki. Klaro ku por kumpra èkstra karchi di BBQ na e sitio aki mes pa 30 florin i tambe por kumpra serbes i softdrinks.

Fundraising
Rotary Club ta un klup di servisio ‘non-profit’ ku, pa medio di tur su eventonan, ta hasi donashon pa e bon kausanan riba nos isla. Foko di Rotary Club Willemstad ta prinsipalmente ‘hubentut di Kòrsou’. E aña aki gran parti di e ganashi di Rotarally lo bai pa Bikes4Kids, un organisashon ‘non-profit’ ku ta sòru pa muchanan di famianan ku poko rekurso no solamente ta haña un baiskel, sino ta duna instrukshon kon kore un baiskel na un manera seif. Meta di e fundashon ta bai mas leu ainda ku fasilitashon di baiskel, hèlmu i slòt di baiskel na e muchanan; nan mester bira mas independiente i desaroyá e sentido di responsabilidat. I naturalmente i sigur no ménos importante: hasimentu di deporte ta salú. Pa mas informashon por konsultá tambe e wèpsait www.bikes4kidscuracao.org

Den pasado ganashi di Rotarally a bai pa un gran kantidat di bon kausa: entre otro Jeugdtheaterschool Drazans i tambe pa e proyekto deportivo di Fundashon Desaroyo i Progreso (FdiP). Otro ehèmpelnan di proyekto ku a haña donashon di Rotary Club Willemstad ta; Casa Cuna Mercedes Winkel, Stichting Encelia, Stichting St. Vincentius, Fundashon Un Hoben Pa un Bon Famia, Kas Bruder Pius, Stichting Pro Alfa, Stichting SHOCK, Departamentu di Mucha di Sehos, Fundashon Pro Bista, Prinses Wilhelmina Fonds i Curaçaose Kunstkring.

Spònser i Benta di Karchi

Rotarally 2017 ta posibel pa medio di e Gold spònser Maduro & Curiel’s Bank i tambe pa medio di spònser Silver Guardian Group, i spònser Brons Regimac. Por kumpra karchi via www.ticketscaribbean.com, Van den Tweel Supermarket (Albert Heijn), Mensing’s Caminada i miembronan di Rotary Club Willemstad. Pa mas informashon por tuma kontakto ku Rotary Club Willemstad na: 540-2679 òf 522-3078.