WILLEMSTAD – Pa tur e partinan di e di 13 edishon di Ride, Swim & Walk for the Roses huntu atrobe alrededor di 10.000 partisipante a inskribí. Nan tur a duna un kontribushon na e éksito di e evento grandioso anual aki i asina nan a kontribuí direktamente na rekoudá fondo na benefisio di kombatimentu di kanser na nos isla ku ta den bon man serka Fondo Prinsesa Wilhelmina (PWF).

Direktiva di fundashon Ride for the Roses bou di presidente Robbin Martina, spònser prinsipal Orco Bank, spònsernan platinum Fundashon Bon Intenshon, Curaçao Port Services, Guardian Group, Curaçao Airport Partners, Gillette i Curoil i tur e otro patrosinadornan, mas e ehérsito di kolaborador i voluntario por wak bèk ku satisfakshon riba ya e di 13 edishon di e evento aki. E resultado ta komparabel ku 2016, loke ta hustifiká e speransa ku e fondonan rekoudá tambe por alkansá alrededor di mei mion florin. Na e momento aki e sifranan eksakto no ta disponibel ainda.

Señal di salida

Presis 7 or mainta Minister Zita Jesus-Leito di Salú, Medioambiente i Naturalesa a duna e señal di salida pa e Walk for the Roses na Awasá. Banda di dje tabatin e ora ei Promé Minister Hensley Koeiman, presidente Robbin Martina di fundashon Ride for the Roses i un representante di PWF. Tur e dos ministernan a kana e ruta largu di kasi 8 kilometer ku a pasa riba e brùg haltu Juliana pa atraves di Waaigat, Pèn i Mari Pompun pa kaba na Mambo Beach/BLVD. Tantu koredó komo kanadó a partisipá. Tabatin tambe un ruta alternativo pa kana for di Awasá riba brùg Emma pa Mambo Beach/BLVD. Tambe danki na polis, Krus Kòrá i hopi voluntario hóben i Dolfijn FM ku a transmití e yegada bibu, e kaminatanan a bai sin problema. Na yegada e partisipantenan a risibí un bunita rosa. Esei tabatin tambe ta warda e partisipantenan na e otro partinan deportivo. E tres partinan di koredó di baiskel di Ride for the Roses tambe a kana zetá. Miéntras ku e kanadónan tabata drentando, pa 8 or e promé grupo di koredó di baiskel a sali pa e ruta di 60 km, siguí djis despues pa esnan pa 40 km i finalmente e grupo di Easy Ride di 10 km, pa Punda i bèk. Salida i final tabata na Mambo Beach.

Spin for the Roses

Mientrastantu tabatin na Mambo Beach e sekshon di Spin for the Roses ku kada bes mas ta gana na popularidat. Aki gruponan bou di guia ta kompetí ku otro riba hometrainer pa rekoudá mas tantu fondo posibel pa e bon kousa.

Mitar di 10 konvoinan a kuminsá kore di Mambo Beach/BLVD pa Zanzibar/Jan Thiel kaminda nèt despues di 12 or di mèrdia e promé landadónan kompetidor a sali, djis despues a sigui nan tras e landadónan di rekreashon. Aki e representante lokal di Hulanda Henk Brons a duna e señal di salida. E promé landadónan di kompetensia a drenta poko mas ku mei ora despues na Mambo Beach BLVD. Despues tabatin entrega di premio. Den e kategoria di dama e ganadornan ta 1. Miriam Weerd, 2. Linsy Heister i 3. Tiareth Cijntje. Entre esnan maskulino nan ta 1. Kaelan Betrian, 2. Christofer Marlin i 3. Joseph Priest. Isacar Paula tabata dilanti meskos ku aña pasá, pero el a landa un pida robes. Tòg e organisashon a dun’é un premio.

Henter dia tabatin hopi aktividat, músika i un bon ambiente na e playa di Mambo Beach. Nèt promé ku 2 or ora algu di áwaseru a manifestá, ya e evento a kaba ofisialmente. E ora ei e parti a kuminsá pa pone tur kos bèk na òrdu pa entregá BLVD limpi bèk.

Sail i Cuevas

Un djadumingu promé tabatin e Sail for the Roses i dos siman promé Randhy Cuevas a subi Seru Kristòf no ménos ku 15 biaha pa e mesun kousa. Awe e tambe a kana den e Walk. Pa tur e elementonan aki huntu a inskribí un total di banda di 10.000 persona atrobe. Tin ku a partisipá na mas ku un elemento. Otronan a inskribí i a paga, pero pa ékis motibu nan a disidí despues pa no partisipá, pero nan tambe a kontribuí na éksito di e evento. PWF por bai traha plan atrobe pa e aña binidero, manera investigashon riba tereno di kanser i guia di pashènt i nan famia. Fundashon Ride for the Roses ta gradesidu na tur, inkluso e partisipantenan, ku a duna nan kontribushon i ta konta ku nan koperashon atrobe pa otro aña.