WILLEMSTAD.- Djabièrnè ultimo a tuma lugá e promé reunion ku tur ‘stakeholder’ ku ta sostené e temporada di Karnaval 2015. Presente tabatin Polis, Brantwer, Ambulans, Ministerio di G.M.N., Ofisina pa Bienestar di Mucha, Tim di Prekario, Directie Wetgeving, Communicatie Onderwijs, Servisio di Obra Públiko, Departamentu di Salu Hubenil, Krus Kòrá, Direktorado di Komunikashon i Informashon, Sektor di Ehekushon Kultura i Deporte, Fundashon Karnaval di Bándabou i tambe A.G.K.K. MEO a asistí pa promé biaha na e enkuentro aki ku ta tuma lugá den un esfera ameno i konstruktivo. E agènda tabatin un karakter di wak mesora e puntonan di evaluashon di Karnaval 2014 i wak dilanti riba e kalènder di aktividatnan pa 2015. Sektor di Kultura i Deporte ta guia e reunionnan aki ku tin komo meta sostené e programa di karnaval ku MEO ta bai trese pa pueblo di Kòrsou kaminda ta tene kuenta ku tur faktor den preparashon di e aktividatnan i ku ta prepará pa tur eventualidat durante e aktividatnan. Un plataforma ideal pa por guia i kordiná e diferente tareanan di e diferente ‘stakeholder’ kaminda tur nanishi ta den mes un direkshon. MEO ta hopi satisfecho ku e resultado di e enkuentro ei. Pa MEO tabat’ei presente Moira Paulina, Evelyn Eustatius, Edmiro Rijnschot i Whitney Martina.