Willemstad – Faltando 1 siman i mei pa e kongreso di dwarslaesie aki na Kòrsou ya no a sobra masha luga debi di registrashon di partisipantenan lokal komo di eksterior pa presensiá lokual ku lo bai duna un empuhe na desaroyo pa hendenan ku dwarslaesie.
Na e konferensia di prensa dia 3 di mei 2016 Fundashon Alton Paas i Revalidatiecentrum a duna mas informashon di e kongreso benidero riba dianan 13, 14 i 15 di mei 2016 na Santa Barbara Beach & Golf Resort. Tantu Fundashon Alton Paas komo Revalidatiecentrum Curacao ta hopi kontentu i agradesido pa e interes i enthousiasmo pa ku e kongreso. E kongreso ta sirbi pa krea e oportunidat pa nos konektá, siña i kompronde mas di loke ta trata dwarslaesie, mas tantu aun e parti di kuido posterior mester wordu drecha pa evita komplikashon mas tantu posibel i krea e kambio nan ku nos ke mira. Ta un echo ku ya pa basta tempu e situashon di e komunidat di hendenan ku a haña un desabilidat no ta manera e mester ta. E evenemento lo duna partisipantenan e posibilidat pa siña for di otro pero tambe un biaha mas analisá kritikamente e kuido posterior.
E situashon di personanan ku tin dwarslaesie riba nos isla no ta fasil. Mayoria no ta bini bek den e proseso laboral, e infrastruktura i tambe asesibilidat riba nos isla no ta dirigi riba personanan den ròlstul. Tin menos posibilidat pa move loke ta pone ku hopi lihe bo ta isolá bo mes ku diferente komplikashonnan komo konsekuensia. Biba ku dwarslaesie ta un reto ku bo mes mester atende ku bo mes.
Aksidente di auto ta na orden di dia. Aksidentenan hopi serio ku konsekuensia fatal. Si ta asina ku bo mester sigui ku un limitashon, e deseo ta bira grandi pa e re-integrashon den komunidat bai mas mihó posibel. Esaki ta algu ku nos tur mester hasi, asina nos por papia di un miho kalidat di vida pa personanan ku dwarslaesie.
Pesei e aña aki nos ta konta ku total 12 orador for di Hulanda, Colombia i Costa Rica i tambe lokal ku lo elabora riba 12 topiko diferente. Ocho (8) di e dòkter ta spesialisá riba nan tereno. E oradornan lokal ta Dr. Ayal Zahavi, Dr. Juan Martina y Dr. Jeanne Koeyers. Dr Dirk van Kuppevelt, Dr. Ellen Maas en Dr. Woet Gianotten ta for di Hulanda. Dr. Juan Carlos Castaño Botero y Dr Federico Montero ta bini respektivamente for di Colombia y Costa Rica y tur dos tambe tin dwarslaesie. Nos lo tin tambe sr. Eithel Baromeo di Trafiko Sigur ku lo duna informashon pa ku prevenshon for di punto di bista di Trafiko Sigur. Mr Junny Harms ku lo papia over di posibilidatnan di rekreashon pa hendenan ku tin dwarslaesie na Kòrsou. Sra Maritza Becher ta un abogado ku lo elabora riba aspektonan tekniko di seguro na Kòrsou i mas profundo den Lei di Labizjan. Sra Yoyceline Lovert ta un persona yòng ku a haña dwarslaesie ku lo tene un diskurso inspirativo “kon pa dil ku kambio”.
Djasabra 14 di mei nos lo finalisá e atardi ku un dialogo tokante di AVBZ, Lei di Labizjan. Mirando e interés grandi pa e congreso desafortunadamente no por registra apart pa e dialogo so. Pa esnan ku tòg ke partisipa na e dialogo por tuma kontakto ku nos via congress@fundashonaltonpaas.org i nos por kontesta segun ku nos ta finalisando e registrashonnan di e kongreso.
Pa dòkternan di kas, e kongreso a keda akreditá pa 9 punto dor di CAN (Commissie Accreditatie Nascholing) bou di number A16.013 pa dokternan di kas. Ku e 9 punto di akreditashon aki, e topikonan interesante i tambe 12 orador inspirativo nos ta premirando ku e kongreso eksitoso e aña. Inskripshon ofishal ta será dia 9 di mei 2016. Inskripshon ta garantisá ora e pago keda hasí. Pa mas informashon por subi e wèpsait di kongreso www.fundashonaltonpaas.org/congress2016.