Willemstad, Djasabra 23 i djadumingu 24 di aprel “Bos di nos Pueblo” lo ta den La Tentashon. “Bos di nos Pueblo” ta un obra presentá pa Teatro KadaKen.

Den e obra aki polítika ta bira personal.  Abo ta tribi di bisa lokual bo ta pensa? Kiko ba to pro òf kontra di dje i pa konta e lokual ku abo ta kere aden? Si pa un dia bo por ta polítiko, kiko abo lo kambia? Huntu ku e aktornan, públiko ta lanta e partido polítiko nobo BDNP. Bos Di Nos Pueblo ta un obra tokante desishonnan difísil entre realidat i bo idealnan, entre reglanan i libertat i tokante e tenshon entre bo propio interesnan i interesnan general. E aktornan ku boso lo mira e wikent aki ta  Christopher Barrow, Donovan Benett,  Norma Cova i Albert Schoobaar. Albert Schoobaar a skibi e teksto bou di direkshon di  Silvia Andringa.

Despues di varios funshon den sentro di bario i skolnan ront Korsou, nan lo presenta Djasabra 23 di aprel och’or i djadumingu 24 aprel seis’or di anochi na La Tentashon. E funshon di dia 24 di aprel lo ta un “fundraising show” pa rekauda fondo pa Teatro Luna Blou. Si ainda bo no a wak “Bos di Nos Pueblo” of tin gana di bin wake un biaha mas esaki sigur lo ta un bon oportunidat. Karchinan ta na balor di Nafl 20,- i  ta optenibel na Mensing’s Caminada of tres ora prome na Teatro Luna Blou. Pueblo di Korsou ta keda kordialmente invita.

Pa mas informashon por yama Teatro Luna Blou na +5999 462-2209 +5999 524-8525. Tambe bo por sigui nos riba facebook: teatro luna blou i la tentashon.