Willemstad – Muchanan na Kòrsou lo gosa di un tremendo trit djaweps 6 di aprel, dia ku ta spera ku nan lo akudí na bòshi na e premier di e pelíkula “Smurfs: The lost village.” E evento aki ta e promé aktividat realisá den kuadro di e CIBC FirstCaribbean su Walk for the Cure 2017. Tur fondo generá ku e pelíkula aki lo bai pa Princes Wilhelmina Fonds pa e fundashon por sigui ku su trabou balioso den e lucha kontra kanser den nos komunidat.  Karchi di entrada pa e premier di “Smurfs: The lost village” ta disponibel na ofisina di CIBC FirstCaribbean i ta kosta Nafl.50,-. Por hasi reservashon dor di yama telefòn 433-8000 òf manda mail na  marketing.curacao@cibcfcib.com. Tur mucha ku bishitá e premier ta keda malkriá ku popcorn, un refresko i cheps di Pringles.

E pelíkula tantu aklamá “Smurfs: The lost village” ta un pelíkula animá ku un drai kompletamente nobo pa e Smurfnan.  E ta kuminsá ora un hòmber misterioso pone e Smurfette i su mihó amigunan Clumsy i Hefty riba un kareda eksitante i emoshonal dor di e mondi prohibí ku ta yená ku bestianan mágiko, te ora nan deskubrí un pueblo pèrdí promé ku e mago malu Gargamel yega. Pasando den un un biahe yená ku akshon i peliger e Smurfnan ta subi un kaminda ku lo hiba nan na deskubrí e sekreto di mas grandi den nan istoria.  Muchanan rònt mundu a bin ta spera e premier di e pelíkula aki.  CIBC FirstCaribbean ta ofresé muchanan di Kòrsou e oportunidat úniko pa ta parti di e primisia aki i na mes momentu kontribuí na un kousa hopi importante den nos komunidat. CIBC FirstCaribean su Walk for the Cure ta un evento regional ku tur aña ta ripití pa generá fondo pa sostené i yuda den kuido di hendenan den nan lucha kontra kanser.  E ta keda tene rònt Karibe den e 17 paisnan kaminda CIBC FirstCaribbean tin su ofisinanan.  E kareda ku e kompania madre di e banko, esta CIBC, ta tene ya pa mas di dos dékada pa sostené Canadian Breast Cancer Foundation a sirbi komo modelo pa e CIBC FirstCaribbean su Walk for the Cure.

Tur fondo generá pa medio di eventonan den kuadro di Walk for the Cure ta keda entregá na Princes Wihelmina Fonds komo sosten na nan lucha kontra di kanser.  E banko a hasi un donashon di riba Nafl.38.000,- aña pasa danki na fondonan generá pa medio di kaminata i otro aktividatnan pa generá fondo. CIBC FirstCaribbean ke gradisí Pringles pa su kolaborashon ku e banko pa por trese e premier di “Smurfs: The lost village” pa e muchanan di Kòrsou.