Pòpkòrn i refresko grátis durante selebrashon di reapertura  entre 2 i 10 di òktober próksimo

WILLEMSTAD – E por hasta parse un titulo di pelíkula ‘E regreso di The Movies’, ku un subtitulo ‘mas grandi i mas mihó ku nunka’. Sinembargo esaki ta un realidat, pa motibu ku e sine di mas gustá na Waaigat a keda kompletamente transformá despues di un renobashon ekstenso i ku un ‘highlight’ nobo, ‘The Movies Café’ ku ta brinda un menú nobo di aperitivo i espasio konfortabel pa sinta. ‘The Movies’ ta selebrá su reapertura ku 9 dia di promoshon, na unda ku bishitantenan ta wòrdu tratá den forma royal. Na kompra di un karchi di ‘The Movies’ entre dia 2 di òktober te ku 10 di òktober próksimo bo ta risibí un kombo grátis konsistiendo di un pòpkòrn i un limonada. Di e manera aki ‘The Movies’ ke gradisí su fanatikonan pa nan pasenshi durante e proseso di remodelashon i pa tur e añanan ku nan a hasi The Movies nan faborito.

Renobá pero ketu bai esun preferí

‘The Movies’ a habri su portanan na 1997 i for di e temporada ei ya kaba a bira masha kerí.  Kuantu sita inolvidabel i fiestanan di mucha no a tuma lugá den e edifisio ei? Tur hende tin rekuerdonan bunita di ‘The Movies’ i danki na e renobashon  aki lo tin hopi mas pa sigui. E sala di sine a mantené su ambiente familiar, pero ta kompletamente renobá ku un koredor nobo, lobby i un  área di konseshon transformá. Algun tempu pasá a modernisá e teknologia di proyekshon ku aparatonan ‘high-tech’ di Dolby Digital ku ta e mesun aparatonan ku ta wòrdu usá den ‘The Cinemas’.

Ban wak pelíkula ku mas plaser

‘The Movies’ lo mantené e menú popular ku ta konsistí di popcorn, hòdòk i slais di pizza. Banda di esaki e bishitante tin oportunidat di disfrutá di e menú nobo di ‘The Movies Café’ ku ta konsistí di batata hasá, krokèt, frikadèl, lumpia, corndogs, hamburger, saté, wraps, kapsalon i hopi mas. Por disfrutá di tur esaki durante di pelíkula òf den e área nobo di sinta ku tin mesanan haltu i stándart.