Curaçao Zoo ta sumamente orguyoso I kontentu ku  e akohida I sosten duna dor di dos organisashon I tambe algun famia ku a bin pa duna un man durante Earth Day at the Zoo. For di aña 1970 e movementu Earth day a kumisa na Merka ku 20 mion hende marchando pa salbaguardia medio ambiente I naturalesa, I awe 47 aña despues Earth day ta wordu organisa masalmente na mas ku 190 pais rond mundu, Curaçao Zoo pa di dos aña sigui ta organisa Earth Day at the Zoo ku e meta pa konsientisa tur nos partisipantenan di  e importansia di un planeta saludabel.

Nos planeta ta pasando den pruebanan fuerte I gran mayoria di e pruebanan aki ta kousa pa nos ku ta ser humano, nos marka ta fuerte den loke ta deforestashon I polushon. Nos a kontribui na e problema global ku ta e di seis extinshon masal ku ta tumando luga kaminda e minimo di shen organismo ta disparse tur dia for di e planeta aki pa semper.

Hopi lo bisa evolushon ta algu eminente. Esei  sigur ,pero no ku e ritmo aktual I sigur e no mester wordu kousa dor di nos ku ta ser humano, Earth day ta yuda e ser humano realisa e balor di kosnan chiki manera un simpel abeha. E importansia di abeha pa sobrebibensia di hopi espesie ta di balora I sigur yuda na konserva.

Djasabra  e boluntarionan di tantu Kiwanis K club I Miss Curaçao Teenager I diferente famia a experensia e parti di hortikultura den nos zoologiko nashonal, un kantidat grandi di mata ornamental I tambe mata ku despues lo bira palunan grandi di fruta a keda planta.  Nos ta sumamente agradesi pa e aporte balioso I alabes e meta pa konsientisa a ser realisa.

Nos ke korda un I tur ku djaluna dia 1 di mei 2017 Curaçcao Zoo lo kumpli 75 aña di existensia.

Un momentu pa para ketu na tur loke a pasa I alabes ku un kurason na luga nos ta sigui traha pa mehora nos patrimonio nashonal.

Un I tur ta keda invita pa bishita nos mashe di pruga djaluna 1 di mei di 10or am pa 5or pm riba nos Kings Plaza na Curaçao Zoo. Lo tin un pida bolo pa tur ku bishita nos e dia aki.