Lo trata e tópiko Terorismo i Menasa Interno
Willemstad – Pa di tres aña konsekutivo Curaçao Airport Partners (CAP) ta organisá e Konferensha di Seguridat den Aviashon (AVSEC). E konferensha ta un plataforma informatívo pa supervisornan di seguridat aéreo, kordinadó- i inspektornan di aviashon sivil den e parti Karibe di Reino Hulandes
kaminda ta presentá tópikonan krítiko riba seguridat i medidanan internashonal. E aña aki CAP a invitá John Pistole, èks-direktor interino di FBI, i Ted Martin, Inspektor di Outoridat di Aviashon Sivil di Trinidad & Tobago, pa duna presentashonnan durante e ‘2016 AVSEC Conference’.
Curaçao Airport Partners (CAP) ta organisá e konferensha anual ‘2016 AVSEC Conference’ ku e meta pa mehorá konosementu pa ku implementashon di medidadnan di seguridat p’asina protehé i salbaguardiá aviashon sivil kontra interferenshanan ilisito kometé na tera òf durante di buelo. Aktualmente e konferensha ta dediká na un grupo spesifiko ku ta laborá den mundu di aviashon riba e islanan Karibense den Reino Hulandes. Sinembargo CAP lo ke ekspandé e grupo aki, p’asina trese un miho interkambio di konosementu i seguridat den región di Karibe.
Invitá oradornan interesante
Un di e maneranan ku CAP ta purba na atraé representantenan den e área di seguridat aéreo pa e konferensha, ta dor di selektá oradornan interesante ku ta trata tópikonan krítiko i aktual. E aña aki CAP a invitá Sr. John Pistole ku lo elaborá riba e tópiko ‘Counter-terrorism’, i Sr. Ted Martin ku lo trata e tópiko ‘Insider threat’.
Sr. John Pistole aktualmente ta presidente di Anderson University na South Carolina, i konosí komo e èks-Direktor Interino di FBI. Pistole a kuminsa su karera den FBI den 1993 i a realisá diferente proyekto sirbiendo na Minneapolis, New York, Indianapolis, Boston i na e ofisina sentral (sede) di FBI na Washington DC. Despues di e atakenan riba 11 di Sèptèmber 2001, Pistole a bira enkargá ku e programa kontra terorismo di FBI. Despues di esaki e la bira sub-direktor ehekutivo enkargá ku Seguridat Nashonal. Den 2004, Pistole a ser nombrá komo Direktor Interino di FBI. Den mart 2006 a otorgá Pistole e rekonosimentu ‘2005 Presidential Rank of Distinguished Executive’. Den 2007, Pistole a risibí e premio ‘Edward H. Levi Award for Outstanding Professionalism and Exemplary Integrity’ di departamentu di Hustisia. Pistole tambe ta èks-presidente di e departamentu ‘Transportation Security Administration’ (TSA). Den 2010 Presidente Barack Obama a nominá Pistole pa e funshon ei, kual a keda aprobá 60 dia despues pa e Senado. E universidat ‘Anderson Uniersity’ tambe a honra Pistole ku e título ‘Honorary Doctor of Laws’. Indiana University tambe a honra Pistole ku e rekonosementu ‘Distinguished Alumni Award from the Robert H. McKinney School of Law’.
Sr. Ted Martin ta e promé inspektor di seguridat apuntá den historia di Trinidad & Tobago na nan departamento ‘Trinidad and Tobago Civil Aviation Authority’. Aktualmente Martin tin komo posishon ‘Senior Aviation Security Inspector’ responsabel pa sertifikashon i vigilansha di operadónan di avion na Trinidad & Tobago. Tambe Martin ta responsabel pa mantenshon di e Database Management System ku ta sostené atminstrashon dje sistema i proseduranan di seguridat pa ku aviashon. Martin alabés ta miembro di e tim di investigashon di Trinidad & Tobago ‘Aircraft Accident/Incident Investigations Response Team’.
Curaçao Airport Partners 2016 AVSEC Conference ta tuma lugá na Kòrsou dia 30 di mei 2016 na Hotèl Renaissance, siguí pa varios ‘workshops’ riba e siguiente dia.