Willemstad, Teatro Luna Blou & La Tentashon ta sumamente orguyoso ku e hóbennan, eks studiante di La Tentashon Performing Arts Academy ku ta studiando teater aya na Hulanda. Ta asina ku Luna Blou & La Tentashon a haña e grato sorpresa ku kuater eks studiante di La Tentashon Performing Arts Academy a gradua e siman aki. Greysha Niebe, Gionel Nicasia Krakeu, Sjaid Fonce i Anton de Bies ta kuater di e hóbennan ku tabata sigui lès di Aktuashon, Kanto  i Baile na La Tentashon. Nan soñonan tabata pa bira Aktor, Bailarin Profeshonal, Dosente di Teater i Kantante. Greysha Niebe a bai studia teater 4 aña pasa na Arties Theater, Leeuwarden. Dos luna pasa e tabata aki na Kòrsou pa a traha riba su proyekto final. E mester a traha un obra pa mucha nan di skol básiko.“Amigu Imaginario” ta e obra ku e la krea huntu ku dos hóben mas. Aworakí e la kaba su MBO nivel 4 i su plan ta pa bira dosente di Teater riba nivel di HBO. Gionel Nicasia Krakeu ta otro studiante ku a partisipá na vários proyekto di La Tentashon. E la sali ganadó den un di e kompetensha nan di Luna Yen. Via di e kompetensha e la haña oportunidat pa a bai Hulanda pa a partisipá na Move Your Art na 2010. Esaki a habri kaminda pa a hasi oudishon na Albeda Dans College. E tambe a gradua di MBO Nivel 4. Sjaid Fonce ta otro hóben multi talentoso. E mes un kos ku Gionel tabata envolví den vários produkshon na La Tentashon i esaki a motiv’é pa a bai studia teater na Hulanda. Aña pasa Sjaid a kaba su MBO nivel 4 na MBO Theaterschool-Hofplein Rotterdam. E aña aki Sjaid lo kuminsá su estudio na un di e mihó Konservatorio na Hulanda,ArtEZ. Anton de Bies tabata sigui lès di aktuashon na La Tentashon. Algun aña pasa Anton a disidí di bai Hulanda  pa e sigui su soñonan, ku ta di bira un gran aktor. Promé e la bai DNA (De Nieuw Amsterdam) esei ta un “Vooropleiding” ku ta dura un aña. Despues e la bai MBO Theaterschool-Hofplein Rotterdam kaminda e la kaba su Nivel 4 den tres aña. Awor e ta bai un di e mihó skolnan di aktuashon na Hulanda kual ta Toneelacademie Maastricht. Nan kuater huntu ku e otro hóbennan di La Tentashon Performing Arts Academy ku a bai algun aña pasa ta logrando nan ophetivonan. Ta pa e motibu ei La Tentashon Performing Arts Academy ta bai kuminsá ku su lès nan nobo. Si bo tambe ke bira manera e hóbennan aki i bo meta ta pa bira un artista. Inskribí awe mes na Teatro Luna Blou. Tin chèns te ku 4 yüli pa inskribí. E lès nan di La Tentashon Performing Arts Academy lo kuminsá den e luna di ougùstùs pa muchanan for di 12 aña te ku 19 aña di edat. E kantidat ta limita pues no warda na lastu momentu. Pa mas informashon bishita nos página wep www.lunablou.com òf yama nos na 462-2209.