…Dia 7 di yüni próksimo den Atrium na Renaissance Resort Curaçao…

WILLEMSTAD– Mei – Ademas ku Starbucks ta e kompania di kòfi mas popular na mundu, nan ta un ekselente siudadano empresarial. Den tur merkado den kual nan ta operá semper Starbucks a kontribuí na e komunidat sea, ku arte, deporte, akshonnan komunitario i karitativo. Dia 7 di yüni próksimo, Starbucks lo tin un otro tipo di evento ku tambe lo ta sumamente interesante. Tur fanátiko di Starbucks ta keda invitá pa forma parti di Starbucks su ‘Our Coffee Diary’. Un ekshibishon ku lo bai duna e kliente informashon detayá di e kompania, e produkto i servisio. Durante di e ekshibishon ‘Our Coffee Diary’ presentá dor di entre otro baristanan di Starbucks lo kombersá tokante e marka di kòfi Starbucks, agrikultornan i e proseso di traha kòfi. Tambe lo splika kiko Starbucks komo kompania ta para pe- su filosofia.

‘Our Coffee Diary’ lo tuma lugá na Renaissance Resort den ‘Atrium’ riba e terser piso. Ta bon menshoná ku e ekshibishon lo wòrdu parti den 3 sala. Den e promé sala lo tin introdukshon di e marka Starbucks, den e di dos sala lo tin oportunidat di purba e promé dos kòfinan kual ta e kòfinan ‘medium’ di Starbucks i den e terser sala lo tin oportunidat di purba e dos diferente ‘dark roast coffees’ di Starbucks. Lo rifa premionan atraktivo i lo tin oportunidat di kumpra produktonan di Starbucks na un preis redusí.

Ademas di esaki, lo pone un bufèt na unda ku tur partisipantenan por pruf diferente ko’i kome ku Starbucks ta ofresé riba su menú. Esnan ku ta deseá di forma parti di e ekshibishon aki tin oportunidat di skohe den dos orario; e promé lo kuminsá 9’or di mainta i terminá 11’or di mainta òf e di dos ku ta kuminsá 3’or di atardi i terminá 5’or di atardi. Entrada pa Starbucks su ‘Our Coffee Diary’ ta grátis pero lugánan ta limitá, pues reservá bo lugá trempan. Tur ku ta deseá di reserva por hasi esaki dor di yena un kupòn na Starbucks, esaki por te ku dia 3 di yüni.  Starbucks ta invitá pueblo di Kòrsou i tur fanátiko pa forma parti di e ekshibishon ‘Our Coffee Diary’. Bini ku bo grupo i sera konosí di serka ku bo marka preferí. ‘Like’ e Facebook page di Starbucks Kòrsou i keda na altura di tur promoshon, kampaña i eventonan spesial.