WILLEMSTAD – mei 2014: Djadumingu último e di 4 edishon di ENNIA Curaçao International Triathlon a tuma lugá. E área di Sta. Barbara Beach Resort i Mijnschappij a resultá atrobe e lokalidat perfekto pa e evento deportivo aki ku distanshanan olímpiko. Despues di e triathlon a tuma lugá un grandioso Beach After Party kual mas di 1.000 persona a presensia aya riba e playa di Sta. Barbara.
ENNIA un biaha mas tabata spònser prinsipal di e evenemento. Otro spònsernan ku a hasi e evenemento akí posibel ta Sta. Barbara Beach Resort, Powerade i Mijnmaatschappij. E aña aki tabatin 200 partisipante ku a inskribí di kual 86 partisipante tabata individual ku a hasi tur tres disiplina kual ta landa (1.5 km), kore baiskel (40 km) i kore duru (10 km). E kantidat di relay tim tabata 38, kada un tim konsistiendo di tres persona ku a hasi un di e disiplinanan. E triathlon aki tin rekonosementu international i ta diferente triatleta di eksterior a bini pa partisipá manera atletanan di Alemania, Hulanda, Merka, Fransia, Venezuela i Aruba.
E ganador apsoluto den kategoria maskulino ta Gaetan Fetaud (tempu 2:01:05) di Fransia. Den kategoria femenino Andrea Jochems (tempu 2:18:58) di Hulanda a resultá ganador apsoluto. E triatletanan di Kòrsou ku a destaká den kategoria maskulino ta Iwan Jonker (tempu 2:18:40) i femenino a bira Marlies Kort (tempu 2:20:30).
Despues di e triathlon tur partisipante i públiko por a disfrutá di e ENNIA Curaçao International Triathlon Beach After Party. E Beach After Party a tuma lugá riba e playa di Sta. Barbara i a dura te ku oranan di atardi. Durante di e Beach Party DJ Maarten Schakel, DJ RO-1 i DJ NRG a pone un ambiente total. Tambe tabatin un “suprise act” di DJ Steve Andreas. E partisipante nan di Miss Universe Curaçao tambe tabata tei pa parti premio na e ganadornan di triathlon.
ENNIA ta felisitá tur atleta ku a forma parti di e ENNIA Curaçao International Triathlon i un pabien speshal ta bai na Iwan Jonker kual alabes ta un kolega di ENNIA. Tambe un danki na e públiko grandi ku a asistí na e Beach After Party.