Willemstad – Fundashon Sentro pa Guia Edukashonal (SGE), e aña aki pa 16 aña konsekutivo huntu ku nos spònser prinsipal, Bo Banko Amigu, Maduro & Curiel’s Bank, a organisá e kompetensia di Lesa pa otro skucha entre nos muchanan di skolnan di fundeshi i skolnan spesial aki na Kòrsou. Den e kompetensia aki kampionnan di e diferente skolnan a kompetí ku otro den ‘lesa pa otro skucha’, lesando na papiamentu i hulandes. Ku e aktividat aki SGE huntu ku Lito i MCB a bin ta promové lesamentu di buki bou di nos muchanan, netamente komo un medio pa komuniká i komprondé teksto, konosé su kultura, su alrededor i nos mundu. ‘Lesa pa otro skucha’ komo un forma diferente di lesamentu ta plaser pa grandi i chikitu i ademas ta stimulá desaroyo di idioma, konsentrashon, kreatividat i abilidat sosial serka e mucha. Djasabra dia 24 di mei último e 10 finalistanan di e diferente skolnan kual ta: Kolegio Erasmo, St. Antonius College, Kolegio San Dominico, dr. Albert Schweitzer FO, M.M.Römerschool, Glorieux College, St. Margaretha College, Marnix FO, St. Paulus College i St Franciscus College a kompetí ku otro den K- Center na Brievengat den e kompetensia final, kaminda tabatin un ambiente tremendo i tur presente a gosa un bòl. SGE ta hopi orguyoso ku ‘Bo Banko Amigu’, Maduro & Curiel’s Bank, a integrá e kompetensia di Lesa pa otro skucha den su proyekto di ‘Kuida bo skol i stima bo skol’. Den kuadro di e proyekto ‘Lesa pa bo skol’ e skolnan di e ganadónan a gana premio poné disponibel pa MCB. E skol di e kampionnan lo risibí kada un Naf. 2.000,-, e di dos premio ta Naf. 1.250,- i e di tres premio ta Naf. 750,-. E skol ku a animá su partisipante mas mihó a risibí Naf.  500,-. Aparte ku tur e amiguitunan di Lito ku a representá nan skol den e rondonan preliminar a risibí bunita regalo di Lito, e finalista i ganadónan tambe lo risibí premionan individual serka Lito. E resultado di e final di e kompetensia ta lo siguiente:

E premio pa e mihó “Yell” a bai pa Kolegio San Dominico

Ganadornan di “Lesa pa Otro Skucha 2014” na Hulandes:

Ganadó apsoluto a resultá Hugo Bos di dr. Albert Schweitzer FO

E promé finalista ta Lianne Candelaira di M.M. Römerschool

E di dos finalista  ta Fayme Francisco di St. Franciscus College

Ganadornan di “Lesa pa Otro Skucha 2014” na Papiamentu:

Ganadó apsoluto a resultá Joewella Maduro di Kolegio Erasmo

E promé finalista ta Altonice Molina di Kolegio San Dominico

E di dos finalista ta Ziahra Bernadina di St. Margaretha College

Sentro pa Guia Edukashonal ta yama un danki spesial tambe na tur e otro spònsernan ku  a kere den e kompetensia aki i a kontribuí ku diferente regalo pa e 10 finalistanan: House of Style, Dolphin Academy, Boekhandel Boekplus, Boekhandel Mensings Caminada, Boekhandel Bruna, Garage Cordia, Otro Kara Tambe, PWC, Curinde, Curaçao Port Authority (CPA), Advocatenkantoor Small Murray Scheper, Ennia, Centrale Hypotheek Bank (CHB), Banko Sentral di Kòrsou i Sint Maarten, Curiol, Refinería Isla, Algemene Spaar – en Kredietcoöperatie (ACU), Mangusa Supermarket, Funmiles, Selikor, Advocatenkantoor Braam & Pols, Biblionef I Advocatenkantoor van Eps Kunneman van Doorne.