WILLEMSTAD:- BLVD na Mambo Beach tin un lugá nobo, “El Pollo”. Un sabor nobo, pa tur ku ta gusta ‘a la parilla’. “El Pollo” a habri su portanan riba e promé piso di e bulevar nèt banda di Greenhouse i El Mexicano. Bishitantenan ta keiru riba e bulevar i tuma nota di e galiñanan fresku i yen di sabor na e ‘brasa’, klá pa wòrdu disfrutá sea komo galiña hinté, mitar, ‘drumsticks’ of ‘wings’. E diferente opshonnan por wòrdu pidí lòs, ku ‘cole slaw’, batata hasá òf ‘cajun fries’ i maishi. Tin diferente sous, esnan ku ta wòrdu sirbí ku e platonan ta mayonès, kèchùp, ‘curry’ i pika di kas- pero tambe ta optenibel sous di pinda i algun otro delisia mas. Tur kliente por bai kas ku nan pedido den un saku spesial pa tene e galiña kayente of sabori’é einan mes na e terasa.

Komo akshon di apertura e promé 200 klientenan ta risibí un kupòn di 50% deskuento riba nan próksimo kompra- sea nan ta us’é durante nan próksimo bishita of por regalá esaki na amigu òf famia. “El Pollo” ta habrí tur dia di siman di 11.30 pa 23.00, riba djaluna i djamars te ku 22.00. Por bestèl tambe te na kas via www.dushifood.com “El Pollo” ta invitabo pa disfrutá di galiña dushi na grill!