Un BHV’er tei pa asistí su koleganan i klientenan den kaso di emergensia

WILLEMSTAD- Resientemente Banco di Caribe a duna oportunidat na tur empleado ku ta interesá den un kurso di BHV pa sigui esaki i risibí sertifikashon. E kurso BHV (Bedrijfs Hulp Verlener) ta un entrenamentu básiko riba e manera di akshoná den kaso ku tin un kandela òf kualke kalamidat. E kurso ta inkluí entrenamentu i sertifikashon di EHBO, reanimashon i konosementu riba uso di mashinnan AED.  Sesenta empleado di Banco di Caribe hopi entusiasmá i interesá den siña mas di BHV a forma parti di e kurso. Entre nan,  Managing Director di Banco di Caribe sr. Dito de Kort.

“Nos ta hañ’é masha importante pa nos empleadonan por yuda nan mes i otronan den un kaso di urgensia. Un BHV’er, ta sertifiká pa den un kaso di emergensia hiba su koleganan i e klientenan na seguridat. Ku e kurso aki nos ta añadí na un ambiente di trabou mas sigur. Konosementu básiko por ta krusial den kualke situashon ora ku un momento di pániko presentá. E kurso aki no ta únikamente pa den nan área laboral, sino ku e por ta benefisioso den nan bida personal tambe”, di akuerdo ku sr. de Kort. Instruktornan lokal di NIBHV a duna e kursonan durante un trayekto di 3 wikènt. Resientemente e 60 empleadonan a risibí nan sertifikado, entre nan tabatin diferente empleado ku a renobá nan sertifikashon.