WILLEMSTAD- 29 di Mei 2013:- Komo parti di su kampaña di konsientisashon Ofisina di Turismo di Kòrsou a organisá  dos training pa su empleadonan. E promé training a trata  e 6 balornan di ‘Dushi Hende’ i e di dos training a trata Desaroyo di Turismo di Kòrsou. Meta prinsipal di e trainingnan aki tabata pa hasi empleadonan di CTB embahadornan di e kampaña di ‘Dushi Hende’ pa medio di e 6 balornan básiko ku ta: servisio, hospitalidat/amabilidat, responsabilidat, orguyo, integridat i honestidat. I sigui engrandese e konosementu di e diferente aspektonan ku tin relashon ku desaroyo di Turismo di Kòrsou.

Durante di e training duná pa Experientia, a train empleadonan di CTB pa asina nan tambe karga e 6 balornan di ‘Dushi Hende’. Esaki a keda hasi por medio di diferente tareanan práktiko. Ta importante pa e empleadonan komo futuro embahadornan di ‘Dushi Hende’ rekonosé i internalisá e 6 balornan. E di dos trayekto di training tabata kaminda empleadonan di CTB a haña tambe mas konsientisashon riba diferente aspekto ku tin relashon ku desaroyo di turismo di Kòrsou pa asina engrandese nan konosementu riba e aspektonan aki.  Durante di e training a trata tópikonan, manera; Kultura i Historia di Kòrsou, Medio Ambiente, Atrakshonnan Turístiko, Ekonomia i Turismo Duradero. E training di konsientisashon di Turismo a wòrdu fasilitá dor di ekspertonan manera Sr. Emlyn Pietersz ku ta guia profeshonal den e industria di turismo, Sr. Leon Pors, biólogo i eksperto den naturalesa i medio ambiente di Kòrsou, Sra. Elia Isenia ku ta eksperto riba tereno di Historia i Kultura di Kòrsou i Sra. Dainadira Martis, ekonomista ku ta laborá na Departamentu di Ministerio Desaroyo Ekonómiko. Direktor di Ofisina di Turismo di Kòrsou Sr. Ghatim Kabbara a bisa ku e ta sumamente kontentu ku empleadonan ta fungi komo embahadornan di ‘Dushi Hende’. Esaki ta hasi e kampaña i nos esfuersonan pa sigui plama e mensahe di ‘Dushi Hende’ ainda mas fuerte. Sr. Kabbara a splika tambe ku ta importante pa empleadonan di CTB keda na altura di e diferente desaroyonan ku ta tumando lugá rondó di turismo di Kòrsou. Ofisina di Turismo di Kòrsou ta sigui enkurashá pueblo di Kòrsou pa ban sigui plama e mensahe ku “Ta Dushi pa ta Dushi Hende”! Pa tur esnan ku ta aktivo riba Facebook kòrda ‘like’ e página di Facebook di ‘Dushi Hende’.