WILLEMSTAD – Resien a tene un enkuentro na Sentro di Bario Wespen pa informá diferente instansia i persona di e trayekto ku a sigui despues ku abitante i komersiantenan di bario di Wespen a bati alarma ku ladronisia i atrako ku karakter agresivo a oumentá den e bario. Gota ku a yena e èmber tabata e agreshon riba un pareha turista ku atrakadónan a kap malamente. Na un enkuentro plenario ku a tuma lugá 19 di mart na Sentro diu Bario Wespen abitantenan i gruponan di interes a vosiferá nan prekupashon i mustra un inkietut enorme pa e situashon kriminalidat kresiente den e bario. Na e enkuentro ei tabata presente Hensley Koeiman, e tempu ei den su funshon di Minister Presidènt, eks-minister di Hustisia, Ornelio Kid Martina i Kenneth Gijsbertha. Sala a pidi pa mas Polis i eventual tambe VKC den e bario banda di otro kondishonnan ku tabata mira komo nesesidat pa frena e ola di kriminalidat. Bosero di kuerpo di polis, inspektor Reggi Huggins, na e enkuentro en kuestion a mustra riba e echo ku solamente oumentando kandidat di Polis i manda VKC den bario lo no yuda na redusí e problema. Sr. Huggins bisa na e okashon ku mas bien inisiativanan di gruponan i individualnan di bario di Wespen i Banda Abou mes pa traha huntu ku Polis lo ta e solashon pa kombatí kriminalidat den e bario.

Puntonan ku a bini dilanti ta aspektonan manera drop outs i push outs for di sistema eskolar, desempleo grandi (prinsipal bou di hóbennan) i e situashon sosial den diferente famia ku ta sklama pa atenshon. Den un siguiente enkuentro, Sr. Hensley Koeiman, e okashon ei den su funshon komo minister di Desaroyo Sosial, Labor i Bienestar a primimtí di aktivá trahadónan sosial den e bario .  Pa e enkuentro di djasabra último Minister Koeiman a informá ku e ministerio entre tantu a pone trahadónan sosial pa den pa laborá den bario di Wespen pone situashonnan agudo ‘in kaart’ i atendé ku esakinan ku solushonnan ku e ministerio tin na su alkanse.

Ya for di e promé enkuentro na luna di Mart diferente persona i organisashon a informá di ke kana un trayekto pa huntu ku kuerpo di Polis yega na solushon pa e retonan. E personan ei a sigui reuní i e grupo poulatinamente a krese. A plania i den transkurso di último lunanan a ehekutá diferente akshon palabrá. A stipulá sinku akshon piloto pa implementá riba término korto.

1. NO solamente stòp algu, pero huntu kuminsá algu nobo i duradero
2. Vigilansia boluntario den bario (mas kòntrol sosial)
3. Redusí aktividat kriminal den e bario ku yudansa di bario mes, ku sosten di Polis i otro stakeholder.
4. Reklutashon di mas boluntario
5. Training i preparashon di boluntarionan

A traha riba riba traha den grupo, balornan di grupo, kompromiso, karga e proyekto, konfiansa, presentashon, liderasgo, union, bon komunikashon, èksito i desafío. Alabes a instalá un regisor di bario ku dentro di poko lo operá for di e edifisio di polis na Wespen. Ta trahando riba aspektonan manera mas iluminashon, limpiesa, infrastruktura i fasilidatnan di e sentro di bario, internèt i kursonan práktikona e sentro i tambe preparashon empresarial, mirando kuantu potensial tin den e bario pa partisipá na desaroyonan ku ta tuma lugá prinsipal riba tereno di turismo.

Komo un di e akshonnan planiá pa fortifiká e relashon entre Polis i bario di Wespen, despues di e reunion, a tene un partido di futbòl. P’e okashon representantenan di bario di Wespen a sali di porta grandi, pero kuerpo di Polis mes ora a pidi  revancha. Sr. Huggins a mustra di ta hopi satisfecho ku e desaroyo komo ku ya kaba bario mes a alertá i frena menasanan ku por a bira situashon ménos agradabel. “Nos no a yega ainda, pero riba un un bon kaminda, “sr. Huggings a bisa. “Nos mester uni forsa pa kombatí kriminalidat. I bario di Wespen i organisashonnan di interes di Banda Abou ta hasiendo esfuerso upa trese trankilidat den e barionan parti pabou di nos isla.”